Sú nýbreytni hefur verið tekin í gagnið hjá OgVodafone að notendur svonefndrar Vodafone live! þjónustu geta fengið nákvæma og myndræna framsetningu á veðurspá í símtækið sitt. "Hægt er að skoða þriggja daga veðurspá í símanum með ítarlegum hætti hvort sem er fyrir þéttbýlisstaði, ferðamannastaði eða miðin í kringum landið," segir í tilkynningu fyrirtækisins. Veðurþjónustan er unnin í samstarfi við Theyr.net veðurspárvefinn.
Vilji fólk kanna veðurhorfur á áfangastað í útlöndum er sleginn inn þriggja stafa flugvallarkóði, en einnig er hægt að setja inn lengdar- og breiddargráður og kalla þannig fram veðurspá fyrir Ísland, Vestur-Evrópu og Norður-Ameríku.
Þegar flett er upp spásvæði birtist þriggja daga spá samantekin í þrjár myndir. Á hverri mynd má sjá nákvæma spá eftir því sem sólarhringurinn líður út frá hitastigi, vindhraða, vindátt, úrkomu og skýjafari. "Þessi þjónusta er nú þegar til staðar í öllum GSM símum sem sem eru með Vodafone live! þjónustuna en gert er ráð fyrir að hún verði komin í flestar gerðir GSM síma frá Og Vodafone á næstu dögum."
