Hefur aldrei tapað útláni

Lánasjóður sveitarfélaga hefur ekki tapað láni frá stofnun sjóðsins árið 1967 og eru vanskil óveruleg. Hlutverk sjóðsins er að tryggja sveitarfélögum, stofnunum og fyrirtækjum þeirra fjármögnun á hagstæðum kjörum en útlán til þeirra eru tryggð með tekjum sveitarfélaga.

Rekstur sjóðsins gekk vonum framar á fyrri hluta ársins og skilaði hann 717 milljóna króna hagnaði samanborið við 377 milljónir króna á sama tímabili í fyrra.

Stjórnendur benda á að hækkun verðlags og vaxta hafi komið sér vel fyrir sjóðinn en hann lánar út á 4,4 prósenta raunvöxtum.

Eigið fé nam 11.455 milljónum króna um mitt ár og var eiginfjárhlutfall (CAD) yfir tvö hundruð prósent.