Hættur með botnlið ÍBV

Guðlaugur Baldursson sagði starfi sínu lausu hjá ÍBV í gærkvöldi en Heimir Hallgrímsson, sem var Guðlaugi innan handar við þjálfun liðsins, er nú tekinn við Eyjaskútunni.

Í yfirlýsingu sem knattspyrnudeild ÍBV sendi frá sér í gær kom fram að deildin virði ákvörðun Guðlaugs og þakkar honum fyrir starf sitt í þágu félagsins en hann tók við liðinu árið 2004. Þar kom einnig fram að Guðlaugur teldi sig vera kominn að ákveðnum lokapunkti með liðið sem situr í neðsta sæti Landsbankadeildar karla og hefur aðeins hlotið ellefu stig í tólf leikjum. ÍBV tapaði 5-0 fyrir Val í síðustu umferð Landsbankadeildarinnar.

Hvorki náðist í Guðlaug né Heimi í gærkvöldi en næsti leikur ÍBV er gegn Víkingum þann 10. ágúst.