Tuttugufaldast í virði á einu ári

Avion Group selur að öllum líkindum yfir meirihluta hlutafjár í dótturfélaginu Avion Aircraft Trading á næstu dögum. Ef af sölunni verður er ljóst að gríðarlegur söluhagnaður fellur til, enda er allt félagið metið á 7,5 milljarða króna (100 milljarða dala) en bókfært verðmæti bara brot af matsvirði, eða 375 milljónir króna. Avion Aircraft Trading er félag sem var stofnað fyrir tæpu einu ári utan um kaup og sölu flugvéla af öllum gerðum en heildareignir félagsins í flugvélum eru yfir tveir milljarðar dala.

Magnús Þorsteinsson, stjórnarformaður Avion Group, segir að hlutirnir gerist hratt í heimi flugvélafjárfestinga og með sölu hlutarins hagnist félagið um 3,6 milljarða við söluna og eigi enn eftir verðmætan hlut. Jafnframt er ljóst að miklar eignir fara út úr efnahagsreikningi sem eru bundnar í þessu félagi.

Heilt yfir er Magnús ánægður með afkomu félagsins á fyrstu sex mánuðum reikningsársins. Gangi salan á Avion Aircraft eftir er ljóst að áætlanir félagsins á árinu breytast til hins betra. Við erum í fínum vexti með þær einingar sem við erum með. Avion er sérhæft félag á sviði flutninga og við höldum okkur við það. Dótturfélagið Excel Airways er að fara í gegnum sitt stærsta sumar frá upphafi og Eimskip hefur á dagskránni að fjór- til fimmfalda veltu á næstu árum.

Á fyrstu sex mánuðum ársins tapaði Avion Group 5,4 milljörðum króna á tímabilinu en hafa ber í huga að stórar árstíðarsveiflur eru í rekstri félagsins; allur hagnaður félagsins myndast til að mynda á seinni hluta ársins. Áætlanir gera ráð fyrir að heildarvelta félagsins nemi tæpum 160 milljörðum króna á árinu og rekstrarhagnaður fyrir afskriftir (EBITDA) verði 12,3 milljarðar króna.

Félagið ákvað að bakfæra samninga Excel Airways við Alpha Airports Group um 750 milljónir króna vegna ágreinings sem stendur um bókhaldslega meðferð samningsins. Þessi varúðarfærsla mun ekki hafa áhrif á sjóðsstöðu eða áætlanir félagsins.