Húsnæðisverð lækkar 2007-2008

Ásgeir Jónsson, hagfræðingur hjá greiningardeild KB banka, spáir því að húsnæðisverð muni lækka í niðursveiflunni í hagkerfinu á árunum 2007 til 2008, en upp úr því séu horfur góðar. Þá megi reikna með að vextir af íbúðalánum hækki á næstunni úr 4,15 prósentum upp í 4,35 prósent. Þetta kom fram á ráðstefnu sem bankinn hélt í gær. Íbúðaverð fer nú heldur lækkandi eftir rúmlega 40 prósenta hækkun á síðustu tólf mánuðum. Ef litið er þrjá mánuði aftur í tímann er hækkunin aðeins 3,4 prósent og í september varð svo lækkun um rúmlega hálft prósent. Sú mikla eftirspurn eftir húsnæði sem fylgdi í kjölfar íbúðalána bankanna hefur náð hámarki og fer nú minnkandi að mati Greiningardeildar KB banka. Þó er ekki útlit fyrir að húsnæðisverð lækki næstu mánuði. Mjög hefur dregið úr sölu fasteigna síðustu mánuði. Kaupsamningum hefur fækkað úr 200-270 á viku síðasta vetur í 150-200 núna. Sérfræðingar Greiningardeildar KB banka telja að þessi þróun haldi áfram og spá því að veltan eigi eftir að minnka um fimmtán prósent á næstu mánuðum. Þrátt fyrir þetta spáir Greiningardeildin að fasteignaverð hækki um sex prósent næsta árið, að því gefnu að vextir hækki ekki að ráði. Þetta er mun minni hækkun en síðasta árið þegar fasteignaverð hækkaði um fjörutíu prósent. Sérfræðingar Greiningardeildar telja hins vegar næsta öruggt að fasteignaverð lækki að raunvirði í næstu niðursveiflu. Það ætti að gerast árið 2007 samkvæmt spám greiningardeilda bankanna um horfur í efnahagsmálum. Í riti Greiningardeildar KB banka um fasteignamarkaðinn er bent á að fasteignaverð hafi lækkað um fimm prósent í niðursveiflunni árin 2001 og 2002 og fjórtán prósent á árunum 1992 til 1998.