Hækkun á við verð Símans

Markaðsvirði skráðra félaga í Kauphöll Íslands jókst um tæplega 61 milljarð króna í júlí einum saman sem er nálægt því verði sem Landssíminn seldist á eftir eitt hundrað ára uppbyggingu. Markaðsvirði skráðra félaga í Kauphöll Íslands nemur í dag um eitt þúsund og fimm hundruð milljörðum króna. Markaðsvirði jókst um tæplega 61 milljarð króna í júlí einum saman. Mest jókst markaðsvirði Landsbankans eða um 19,5 milljarða en þar á eftir kemur Actavis sem bætti við sig um 19,4 milljörðum króna. Aukning á markaðsvirði Actavis stafar aðallega af útgáfu nýs hlutafjár í mánuðinum fyrir um 14 milljarða í kjölfar kaupanna á bandaríska lyfjafyrirtækinu Amide. Mest lækkun varð hins vegar á markaðsvirði Mosaic Fashions í mánuðinum en hún nam 3,2 milljörðum. Þórður Friðjónsson, forstjóri Kauphallar Íslands, segir hækkanirnar miklar. Hver prósentuhækkun feli í sér háar fjárhæðir vegna þess að markaðurinn sé orðinn stór, hann sé reyndar stærri en annars staðar á Norðurlöndum. Spurður hvort hækkarnir séu eðlilegar segir Þórður að það hafi gengið afskaplega vel, hagvöxtur hér á landi sé meiri en annars staðar og fyrirtækin í Kauphöllinni skili gríðarlega miklum hagnaði. Þess vegna ríki mikil bjartsýni og hlutabréfaverðið hækki. Verðmæti skráðra félaga í Kauphöllinni hefur aukist um 378 milljarða frá áramótum. Þróunin það sem af er ágúst hefur ekki verið verri í því samhengi og hefur markaðsvirði félaganna í Kauphöllinni nú aukist samtals um 58 milljarða króna. Meirihluti fyrirtækja í Kauphöllinni sem hafa birt afkomutölur fyrir annan ársfjórðung hafa skilað mun betri afkomu en greiningardeildir bankanna gerðu ráð fyrir og skýrir það vafalaust að hluta til ofangreindar verðhækkanir félaganna síðustu daga.