Fermetraverð fari yfir 200 þúsund

Greining Íslandsbanka spáir 15 prósenta hækkun á íbúðarverði til viðbótar þar til það staðni síðla á næsta ári. Meðalfermetraverð yrði þá komið yfir 200 þúsund krónur. Þó er tekið fram að lítið megi út af bregða til að ekki komi til lækkunar. Í niðurstöðum fræðslufundar Íslandsbanka um þróun á fasteignamarkaði kemur fram að raunverð íbúða sé í sögulegu hámarki en þó er gert ráð fyrir því að verð mjakist enn upp á við fram á næsta ár en staðni svo. Reiknað er með lítils háttar lækkun raunverðs íbúðarhúsnæðis á árinu 2007. En er ekki bjartsýni að ætla að verð haldi áfram að hækka nú þegar nýbyggingar eru fleiri en nokkru sinni, verðbólga gæti aukist og gengið lækkað? Ingólfur Bender, forstöðumaður Greiningar Íslandsbanka, segir að ef eitthvað sé sé greiningardeildin of svartsýn fremur en bjartsýn. Þá hafi verið rætt um stóriðjuframkvæmdir víða um land sem geti breytt myndinni talsvert. Greiningardeildin hvetur fólk frekar til að kaupa íbúð en að leigja og bíða um hríð. En nú þegar bankarnir hafa mikilla hagsmuna að gæta á fasteignamarkaði og það skiptir þá máli að verð haldist hátt og fólk haldi áfram að kaupa, er þá hægt að líta á spá greiningdeildar Íslandsbanka algerlega hlutlausum augum? Ingólfur segir að greiningardeild starfi algjörlega sjálfstætt og deildin eigi í raun allt undir þeim trúverðugleika og ábyrgð þess sem frá henni komi. Ekki sé tekið mið af hagsmunum bankans, en ef verð á íbúðarhúsnæði væri að lækka að mati deildarinnar myndi hún greina frá því, ekki bara gagnvart almenningi heldur líka stjórnendum bankans og vara við að sú þróun kynni að skaða bankann með einhverjum hætti.