Allir á förum frá ÍR?

Það bendir allt til þess að ÍR muni tefla fram mikið breyttu liði á næstu leiktíð enda eru leikmenn félagsins mjög eftirsóttir. Fyrirliði liðsins, Bjarni Fritzson, er búinn að semja við franska félagið Créteil og svo eru þrír lykilmenn liðsins undir smásjá erlendra liða.Danska úrvalsdeildarfélagið Ajax hefur boðið Hannesi Jóni Jónssyni og Ingimundi Ingimundarsyni samning og samkvæmt heimildum Fréttablaðsins mun Hannes væntanlega skrifa undir sinn samning fljótlega.  Ingimundur mun aðeins bíða með að skrifa undir samning við Ajax þar sem hann heldur á mánudaginn til Sviss ásamt markverðinum Ólafi Gíslasyni en þeir verða til reynslu hjá Winterthur fram á næsta fimmtudag. Félagið ku vera mjög spennt fyrir þeim félögum og ekki ólíklegt að þeir fari frá Sviss með samningstilboð í töskunni.