Real getur minnkað muninn í 3 stig

Real Madríd mætir Villareal í spænsku 1. deildinni í knattspyrnu í kvöld. Leikurinn hefst klukkan 20 og verður sýndur beint á Sýn. Real getur minnkað forystu Barcelona í þrjú stig en Barcelona mætir Malaga á morgun. Í marki Villareal er hinn 22 ára Jose Manuel Reina sem í morgun var orðaður við enska úrvalsdeildarliðið Liverpool. Reina er samningsbundinn Villareal til ársins 2012 en í samningi hans er klásúla sem segir að honum sé heimilt að fara frá spænska liðinu fyrir 8,25 milljónir punda, eða tæpan milljarð íslenskra króna. Senegalinn El Hadji Diouf er sagður ganga upp í kaupin en Liverpool á samkvæmt fjölmiðlum í morgun að fá þrjár milljónir punda fyrir hann.