Lyfjamarkaðurinn opinn öllum

Vegna umfjöllunar fjölmiðla um samkeppnisumhverfi og verðmyndun lyfja á Íslandi vill lyfjafyrirtækið Actavis taka fram að íslenski markaðurinn sé opinn öllum þeim sem sækist eftir að selja lyf á markaðnum og uppfylla skilyrði Lyfjastofnunar. Hörð samkeppni ríki milli lyfjafyrirtækjanna um sölu lyfja og Actavis sé aðeins með 17% markaðshlutdeild á íslenskum lyfjamarkaði.Halldór Kristmannsson, forstöðumaður innri og ytri samskipta fyrirtækisins, segir Samkeppnisstofnun þrívegis hafa skoðað atriði sem tengist starfsemi Actavis á undanförnum árum, síðast fyrir þremur árum í tengslum við samruna og kaup fyrirtækja. Hann segir stofnunina hafa engar athugasemdir gert við starfsemi fyrirtækisins og á þessum tíma hefur markaðsstaða Actavis á Íslandi ekki breyst. „Við höfum nú þegar sett okkur í samband við Samkeppnisstofnun og boðið fram okkar aðstoð í málinu, telji hún ástæðu til að skoða málið,“ segir Halldór.  Þá telur Halldór umfjöllun um félagið og verðsamanburð lyfja í fjölmiðlum hafa verið misvísandi. Samkomulag hafi verið gert við lyfjagreiðslunefnd á síðasta ári og Actavis lækkað verð sín um 140 milljónir króna og þannig lagt sitt af mörkum til að lækka lyfjaverð á Íslandi. Til viðbótar séu lyf sem nú eru sett á markað á Íslandi verðlögð samkvæmt ákveðinni formúlu sem lyfjagreiðslunefnd hafi samþykkt þar sem tekið er mið af meðalverði lyfja á Norðurlöndunum. „Við vinnum samkvæmt þessu og um þetta ríkir full sátt milli okkar og heilbrigðisráðuneytisins,“ segir Halldór.