Haukar í toppsætið

Haukar tylltu sér á topp DHL-deildarinnar í handknattleik karla í kvöld er þeir sigruðu bikarmeistara ÍR örugglega 24-31 í Austurbergi. Markverðir beggja liða voru í sérflokki í leiknum en Birkir Ívar Guðmundsson varði 26 í marki Hauka og Hreiðar Guðmundsson 22 í marki ÍR. Í Vestmannaeyjum sigruðu heimamenn HK 31-26. Fyrir ÍBV var Tite Kaladze atkvæðamestur og skoraði 10 mörk en Robert Bognbar skoraði 7. Ausustas Strazdas og Elías Már Halldórsson voru atkvæðamestir í HK liðinu með 5 mörk hvor.