Ný, tölvuvædd fasteignasala

"Sérstaða okkar á markaðinum er að við auglýsum eiginlega alfarið á netinu. Einnig erum við með verðvernd þannig að við tryggjum að vera alltaf með lægstu söluþóknun á Íslandi. Fasta þóknunin okkar er 99.900 krónur eða 124.375 krónur með virðisaukaskatti," segir Jóhann Baldursson lögmaður, löggildur fasteignasali og eigandi fasteignasölunnar Neteign sem hóf starfsemi í síðustu viku. "Enn sem komið er erum við bara með íbúðarhúsnæði en ekki iðnaðar- og verslunarhúsnæði. Það breytist ef til vill þegar fram líða stundir," segir Jóhann en skráning eigna á söluna fer eingöngu fram í gegnum vefsíðu þeirra, neteign.is. "Seljendur skrá eignina sjálfir inná netið og geta jafnvel hlaðið inn myndum sjálfir ef þeir vilja. Í kjölfarið heimsækir sölumaður frá okkur seljendurna og fer yfir lýsinguna. Seljendur sýna eignina sjálfir en sölumaður sér um móttöku tilboða. Við erum einnig með lögfræðing í vinnu hjá okkur sem sér um lagalegu hliðina. Vefsíðan er afskaplega einföld og ætti hver sem er að geta skráð sína eign þar inn." Margir myndu halda að fasteignasölumarkaðurinn á Íslandi væri mettaður en Jóhann er á öndverðum meiði. "Það eru vissulega margar fasteignasölur hér á landi en við bjóðum uppá sérstök kjör sem ég held að höfði til fólks. Fólk er vant ólíkum möguleikum og kjörum á hvaða sviði sem er og sérstaða okkar á fasteignasviðinu er meðal annars sú að bjóða lægstu söluþóknun á Íslandi," segir Jóhann og bætir við að reksturinn hafi farið vel af stað. "Við erum búin að auglýsa þó nokkuð og það er mikið spurt um starfsemi okkar. Einnig er umferð um vefsíðuna heilmikil en auðvitað tekur tíma að koma þjónustu okkar og vöru á framfæri," bætir hann við og er afskaplega bjartsýnn á framhaldið.