Girðing þvert yfir flugbrautina

Girðing hefur verið reist þvert yfir flugbrautina fyrrverandi í Holti í Önundarfirði til að verja friðað æðarvarp og landgræðslu fyrir ágangi manna og dýra. Þetta kemur fram á fréttavefnum Bæjarins Besta. Flugvöllurinn í Holti var með öllu aflagður árið 2000 en Stína Gísladóttir, prestur og æðarræktandi í Holti, segir girðinguna þó hafa verið setta upp í samráði við flugmálayfirvöld. Þótt völlurinn sé tæknilega séð ekki lengur til þá er hann merktur inn á öll kort og gæti virst ákjósanlegur lendingastaður fyrir flugmenn. Myndin er frá Önundarfirði.