Lærisveinar Guðmundar rassskelltu Egyptana í kvöld | Úrslitaleikur á móti Íslandi

Guðmundur Guðmundsson, þjálfari danska landsliðsins í handbolta, gat verið ánægður með sína menn í kvöld.

Danir unnu þá afar sannfærandi tíu marka sigur á Egyptum, 36-26, í Bygma-æfingamótinu.

Danska landsliðið hefur unnið tvo fyrstu leiki sína á mótinu en mætir íslenska landsliðinu í úrslitaleik mótsins á sunnudaginn.

Danska handboltalandsliðið er svo sannarlega búið að hrista af sér slyðruorðið síðan í fyrri hálfleik á móti Ungverjum í gær. Ungverjar voru þá fjórum mörkum yfir í upphafi seinni hálfleiks en danska liðið vaknaði þá af værum blundi og vann lokakafla leiksins með sjö mörkum.

Staðan var 2-1 fyrir Egypta í byrjun leiks en þá komu tvö dönsk mörk í röð og Danir komust í framhaldinu í 7-4 og 10-6. Danir voru síðan fjórum mörkum yfir í hálfleik, 17-13.

Danir voru síðan með örugga forystu allan seinni hálfleikinn og unnu á endanum með tíu marka mun.

Ísland og Danmörk mætast á sunnudagskvöldið en það verður úrslitaleikur Bygma-mótsins. Dönum nægir jafntefli.

Ungverjar gætu reyndar blandað sér í baráttuna með sigri á Egyptum fyrr um daginn. Íslensku strákarnir vita hvað þeir þurfa að gera fyrir leikinn.