Bakgarðsáskorunin: „All-in týpa“ sem elskar Celine Dion

Þuríður Elín er 39 ára landsliðsmaður í Bakgarðshlaupi. Hún tekur þátt í landsliðakeppninni sem fer fram þann 17. október. Þuríður hefur mest farið 33 hringi en hlaupið gengur út á að hlaupa 6,7 kílómetra á klukkustund, eins oft og hægt er.

Landsliðakeppni í Bakgarðshlaupi hefst 17. október og verður í beinni útsendingu á Vísi.

Hvenær byrjaðir þú að hlaupa?

Ég byrjaði að hlaupa markvisst sumarið 2022.

Af hverju ákvaðst þú að taka þátt í Bakgarðshlaupinu? Hvað hefur þú tekið oft þátt?

Ég tók fyrst þátt vorið 2023 og fannst þetta fyrirkomulag virkilega skemmtilegt og tók því þátt aftur um haustið og þá var ekki aftur snúið! Ég hef tekið þátt í 6 bakgarðshlaupum.

Hvern er best að spjalla við í hringnum?

Ég hef mest hlaupið ein en í vor spjallaði ég mikið við Guðjón, Þorleif og Hildi en vonandi næ ég að spjalla við fleiri í komandi hlaupi 😊

Hvað er best að borða þegar þú tekur þátt í Bakgarðinum?

Kartöflustappa og flatbrauð með skinku og osti 😊

Hvaða liðsmaður er með besta nestið?

Ætli það sé ekki Gummi 😊

Hvað gerir þú þegar þú ert ekki að hlaupa?

Ég vinn sem aðalbókari hjá Kaupfélagi Skagfirðinga, á eiginmann og þrjú börn. Þegar ég er ekki í vinnunni, með fjölskyldunni eða úti að hlaupa, þá er ég að prjóna og horfa á sjónvarpið :Þ

Hvað ætlar þú þér að fara marga hringi í október?

Stefni á að hlaupa eins marga hringi og líkaminn leyfir mér!

Hvað er það vandræðalegasta sem þú hefur lent í í Bakgarðshlaupinu?

Ætli það sé ekki þegar systir mín fór að þvo mér í framan og tannbursta mig til að rífa mig í gang eftir einn erfiðan og þreyttan hring í Heiðmörk í fyrra 😊

Hver er uppáhalds Bakgarðsbrautin þín og af hverju?

Heiðmörk er í uppáhaldi, finnst hún mjög skemmtileg og hentar mér mjög vel.

Hvaða liðsmaður kemur mest á óvart í hlaupinu?

Hekla og Gunnar Lárus

Hver er þinn stærsti styrkleiki í Bakgarðshlaupi? En veikleiki?

Minn stærsti styrkleiki er sennilega þrjóskan og ætli veikleikinn sé ekki hraðinn, ég væri stundum til í að geta farið aðeins hraðar yfir en læt það ekki stoppa mig!

Hvað er það skrítnasta sem þú hefur gert til að halda þér gangandi í hlaupi?

Veit ekki hvort það sé skrítið en ég tala mikið upphátt við sjálfa mig og hvet mig áfram!

Hver er duglegastur í liðinu við að hvetja aðra áfram?

Það er klárlega Tommi! Þorleifur og Guðjón eru líka mjög öflugir og duglegir að deila fróðleik.

Ef þú mættir bara hlusta á eitt lag allan tímann, hvaða lag væri það?

Ég er þessi sem get fengið æði fyrir einhverju lagi og hlustað á það endalaust og því erfitt að velja bara eitt lag! En það væri sennilega eitthvað sígilt með Celine Dion.

Hvernig myndir þú lýsa þér fyrir einhverjum sem þekkir þig ekki?

Ákveðin, þrjósk, með lúmskan húmor, svolítið óþolinmóð, með þörf fyrir áskoranir og mikla hreyfingu og er smá þessi all-in týpa 😊

Hvað er best að gera eftir Bakgarðshlaup?

Fara í heita sturtu!

Hver er líklegastur til að byrja að syngja á hlaupum?

Ég held að Hildur eigi eftir að syngja fyrir okkur.

Ef þú ættir að lýsa liðinu með þremur orðum, hvaða orð myndirðu velja?

Þrautsegja, gleði og seigla