Missti eins árs gamlan son sinn

Hinn 29 ára gamli Lagarde, sem varð Ólympíumeistari með Frakklandi í Tókýó árið 2021, hefur ekki leikið með liði Nantes í upphafi leiktíðar.

Nú hefur franska félagið greint frá því að eins árs gamall sonur hans sé látinn. Í tilkynningu biður félagið um frið fyrir Lagarde og hans fjölskyldu sem nú syrgir barnið.

„Það er með mikilli sorg sem HBC Nantes upplýsir um þann hræðilega harmleik sem hefur dunið yfir Romain og fjölskyldu hans við missi sonar þeirra.

Andspænis þessari gríðarlega sársaukafullu raun vill allt HBC Nantes – stjórnendur, leikmenn, starfslið, starfsmenn og sjálfboðaliðar – votta Romain, fjölskyldu hans og aðstandendum stuðning sinn og hlýju og senda þeim innilegustu samúðarkveðjur.

Á þessum tímum, þegar friðhelgi fjölskyldunnar verður að vera að fullu virt, biðlum við til alls samfélags HBC Nantes – stuðningsmanna, samstarfsaðila, sjálfboðaliða, fjölmiðla og velunnara – að hafa ekki beint samband við Romain á næstu dögum og vikum.

Við vitum að við getum treyst á skilning, nærgætni og velvild allra.

Allt HBC Nantes stendur með ykkur,“ segir í tilkynningunni.

Lagarde hóf feril sinn með Nantes á árunum 2016-19 en lék svo með Rhein-Neckar Löwen í Þýskalandi og PAUC í Frakklandi áður en hann sneri aftur heim til Nantes fyrir síðustu leiktíð.

Lagarde hefur verið landsliðsmaður Frakklands frá árinu 2017 og unnið Ólympíugull sem og silfur og tvær bronsmedalíur á HM og bronsverðlaun á EM.