Kemur fyrir­liða KR til varnar: „Talar beint frá hjartanu“

Arnar Freyr sneri aftur inn á völlinn í mark KR-inga í hálf­leik gegn Skagamönnunum á dögunum, um fjórum mánuðum eftir að hafa slitið sin í hné í leik gegn Kefla­vík í fyrstu um­ferð Bestu deildarinnar.

„Það var talað um að þetta gætu verið fjórir mánuðir sem var raunin. Það gekk allt vel, ekkert bak­slag. Allt eins og í sögu,“ segir Arnar í sam­tali við Vísi. „Ég var hundrað pró­sent klár í að koma inn á. Ef þú spyrð mig hefði ég verið til í að þetta hefði gengið hraðar fyrir sig. Að vera frá í þrjá til fjóra mánuði er alveg langur tími. En ég held að þetta sé bara á eins góðum tíma og hægt er.“

Erfitt að sitja upp í stúku

KR-ingar hafa að margra mati spilað skemmti­legasta fót­boltann á tíma­bilinu í Bestu deildinni. Liðið situr í 3. sæti og hefur skorað flest mörk af liðum deildarinnar. Það reyndist Arnari erfitt að sitja uppi í stúku og horfa á.

„Hundrað pró­sent. Sér­stak­lega þegar gengur vel þá langar mann að taka þátt í því. Það var alveg pínu súrt að þurfa að sitja uppi í stúku og fylgjast með þessu en samt líka gaman að sjá að við séum á þeim stað sem við erum á í dag.“

Trú á titli lifir

KR er níu stigum á eftir topp­liði Víkings Reykja­víkur og hefur verið að hiksta í undan­förnum leikjum þegar að nú eru aðeins fimm um­ferðir eftir af deildinni. KR-ingar gefa ekki upp von á Ís­lands­meistara­titli fyrr en sú von er endan­lega úr sögunni.

„Það eru níu stig í Víking. Það getur allt gerst í fót­bolta. Meðan það er enn von þá trúir maður. Mark­mið. Við ætlum bara að vinna alla leiki og sjá hvort það dugi ekki til að enda í fyrsta sætinu. Svo kemur bara í ljós hvort það takist eða ekki.“

Engar klisjur bara beint frá hjartanu

Aron Sigurðar­son, fyrir­liði KR, hefur farið mikinn í viðtölum á undan­förnum vikum og fengið á sig skerf af gagn­rýni fyrir sína fram­komu. Innan vallar hefur hann sýnt snilli sína og raðað inn mörkum. Arnar kemur fyrir­liða sínum til varnar.

„Hann talar beint frá hjartanu og er að segja það sem honum finnst. Við ættum frekar að fagna því heldur en hitt að hafa ein­hverja leik­menn sem eru til­búnir að fara út fyrir rammann, tala ekki bara í ein­hverjum klisjum og ein­hverju dóti.“

Hann hefur fengið smá hita á sig. Finnst þér það órétt­látt?

„Já, mér finnst það. Bara flott ef fólk hefur ein­hverja skoðun á þessu. Ef það eiga allir að vera með ein­hverjar klisjur þá er leiðin­legt að hlusta á það. Ég fagna þessu alla­vega. Ég hlakka alltaf til þegar ég veit að hann fer í viðtöl. Bíð spenntur eftir því að horfa á þau. Ég segi bara meira af þessu.“

KR tekur á móti ÍA í fyrstu umferð efri hluta Bestu deildarinnar í dag klukkan tvö. Leikurinn er sýndur í beinni útsendingu á Sýn Sport Ísland 2.