Haraldur Noregs­konungur borinn til grafar

Haraldur lést 28. ágúst síðastliðinn, 89 ára að aldri. Hann verður jarðsunginn frá dómkirkju Óslóar klukkan ellefu í dag. Kistan verður svo flutt til kirkjunnar í Akurshúskastala þar sem fjölskyldan heldur minningarstund og verður hann lagður til hinstu hvílu í konunglegu grafarhvelfingunni. 

Fjöldi þjóðhöfðingja hefur lagt leið sína til Óslóar, þar á meðal Halla Tómasdóttir forseti Íslands og Björn Skúlason eiginmaður hennar. Þá verður Volódómír Selenskí Úkraínuforseti einnig viðstaddur athöfnina sem og Vilhjálmur krónprins Bretlands. Fulltrúar konungsfjölskyldna leggja einnig leið sína til Noregs, þar á meðal frá sænsku, dönsku, jórdönsku, hollensku og spænsku konungsfjölskyldunum. 

Norskir fjölmiðlar greina frá því að búið sé að girða af stóran hluta borgarinnar vegna jarðarfararinnar og hafa lögreglumenn frá Svíþjóð og Danmörku komið til að aðstoða nágranna sína. Þeir sem vilja komast inn á svæðið þurfa að fara í gegnum öryggisleit og búið er að banna ýmsa muni, svo sem reiðhjól og regnhlífar.

Nú þegar eru komnar langar raðir og er búist við töluverðum fjölda fólks.