Draumur Bol­víkinga rætist gegn risunum í ís­lensku golfi

Viðureignin hófst á Strandarvelli á Hellu klukkan átta í morgun. Leiknir eru tveir fjórmenningar og þrír tvímenningar og fór síðasti leikurinn af stað klukkan 8.40.

GR varð Íslandsmeistari golfklúbba karla í 26. sinn í fyrra.

Síðar í dag, klukkan 14, mæta Bolvíkingar Golfklúbbi Akureyrar og klukkan átta í fyrramálið tekur við Golfklúbbur Mosfellsbæjar. Tvö efstu lið riðilsins komast í undanúrslit en hin tvö leika um fimmta til áttunda sætið.

Litli klúbburinn kominn meðal þeirra bestu

Stærðarmunurinn á GBO og félögunum þremur sem Bolvíkingar mæta í riðlinum er töluverður.

Golfklúbbur Reykjavíkur telur um 3.400 félagsmenn, Golfklúbbur Mosfellsbæjar um 2.375 og félagsmenn Golfklúbbs Akureyrar eru um 1.060.

Í Golfklúbbi Bolungarvíkur eru félagsmenn um 140 talsins.

Þeim hefur þó fjölgað gríðarlega á skömmum tíma. Fyrir aðeins þremur árum voru um 40 manns í félaginu. Félagatalan hefur því meira en þrefaldast og fjölgunin nemur um 250 prósentum.

GR er eftir sem áður um 24 sinnum fjölmennara en GBO, GM um sautján sinnum fjölmennara og GA rúmlega sjö sinnum fjölmennara.

Bolvíkingar hafa hins vegar klifið deildakerfið hratt undanfarin ár. GBO vann 5. deild árið 2020, 3. deild árið 2023 og 2. deildina í fyrra. Nú er litli klúbburinn úr Syðridal kominn alla leið í hóp þeirra bestu.

„Mig hefði aldrei órað fyrir þessu“

Einn þeirra sem upplifa tímamótin með sérstökum hætti er Rögnvaldur Magnússon, fæddur og uppalinn Bolvíkingur, PGA-golfkennari og forstöðumaður Golfferða Golfskálans.

Rögnvaldur tók sín fyrstu skref í golfi á Syðridalsvelli og hefur síðan gert golfið að stórum hluta af starfsævinni. Hann hefur starfað við golfkennslu um árabil og getið sér gott orð sem golfkennari auk þess að leiða golfhópa erlendis.

„Ég tók mín fyrstu skref í golfi heima í Bolungarvík og mig hefði aldrei órað fyrir því þá að Golfklúbbur Bolungarvíkur ætti einn daginn eftir að vera kominn í efstu deild og keppa við stærstu og bestu golfklúbba landsins,“ segir Rögnvaldur.

Hann segir það sérstaka tilfinningu að vera nú sjálfur hluti af sveitinni á þessum tímamótum.

„Fyrir mig sem Bolvíking og golfara er þetta bara draumur að rætast. Það er ótrúlega gaman að sjá hvað klúbburinn hefur vaxið og að við séum komin alla þessa leið.“

Íslandsmeistararnir mun sterkari á pappírnum

Níu kylfingar eru skráðir í sveit Golfklúbbs Bolungarvíkur.

Það eru Flosi Valgeir Jakobsson, Davíð Gunnlaugsson, Emil Þór Ragnarsson, Ernir Steinn Arnarsson, Rögnvaldur Magnússon, Anton Helgi Guðjónsson, Jón Arnar Sigurðarson, Ragnar Már Ríkarðsson og Daði Valgeir Jakobsson.

Daði er jafnframt liðsstjóri sveitarinnar og Óli Rafn Kristinsson aðstoðarliðsstjóri.

Á móti þeim standa kylfingar úr nokkrum stærstu og öflugustu golfklúbbum landsins. Í sveit GR eru meðal annars Hákon Örn Magnússon, Sigurður Bjarki Blumenstein og Guðmundur Ágúst Kristjánsson.

Rögnvaldur segir engan í herbúðum Bolvíkinga velkjast í vafa um að sveitin sé lakari á pappírnum en flestir mótherjarnir.

„Við vitum alveg hvernig þetta lítur út á blaði. Við erum litli klúbburinn og erum að mæta frábærum kylfingum frá miklu stærri félögum. En við erum með stórt hjarta, það er gríðarlega góð gleði í hópnum og við höfum engu að tapa.“

Það sé einmitt hluti af styrkleika sveitarinnar.

„Við erum góðir vinir, okkur finnst gaman að vera saman og við ætlum að njóta þess að vera þarna. Svo förum við bara í hvern leik með það að markmiði að vinna.“

Allt getur gerst í holukeppni

Fyrirkomulag Íslandsmótsins gefur Bolvíkingum líka ákveðna ástæðu til bjartsýni.

Keppt er í holukeppni en ekki hefðbundnum höggleik. Í hverri viðureign eru leiknir tveir fjórmenningar og þrír tvímenningar og hvert einvígi gefur eitt stig.

Þar skiptir heildarskor kylfingsins yfir hringinn engu máli. Ein hola vinnst í einu og slæm hola getur verið gleymd um leið og komið er á næsta teig.

„Það er einmitt það skemmtilega við holukeppnina. Þú þarft ekki að vera betri kylfingur en maðurinn á móti þér alla daga ársins. Þú þarft að vera betri en hann þennan dag,“ segir Rögnvaldur.

„Sagan hefur sýnt okkur aftur og aftur að í holukeppni getur hreinlega allt gerst. Við vitum að við erum minni spámenn, en það er ekkert búið að vinna þessa leiki áður en þeir hefjast.“

Hituðu upp með Albatross

Stemningin í hópnum virðist ekki heldur hafa verið þrúgandi kvöldið fyrir stærsta verkefni í sögu klúbbsins.

Bolvíkingarnir ákváðu nefnilega að hita upp fyrir mótið með því að horfa saman á íslensku gamanmyndina Albatross.

Valið var ekki tilviljun.

Myndin gerist að stórum hluta á Syðridalsvelli í Bolungarvík og segir frá Tómasi, ungum manni úr Reykjavík, sem eltir kærustuna vestur á firði og ræður sig í sumarvinnu hjá Golfklúbbi Bolungarvíkur. Þegar sambandið fer út um þúfur situr hann eftir í Bolungarvík innan um skrautlegar persónur á golfvellinum.

Yfirmaður klúbbsins í myndinni á sér jafnframt stóran draum fyrir litla völlinn í Syðridal: að fá sveitakeppni golfklúbba til Bolungarvíkur.

Rúmum áratug síðar er raunverulega sveitin úr Syðridal komin öllu lengra en persónurnar í Albatross hefðu kannski þorað að láta sig dreyma um.

Í morgun gekk Golfklúbbur Bolungarvíkur út á völlinn í fyrsta sinn í deild þeirra bestu og beið þar ekkert minna verkefni en ríkjandi Íslandsmeistararnir sjálfir.