Kominn með samning við risa­fyrir­tæki og fær eigin pílur

„Þetta er samningur við Shot sem er í Nýja-Sjálandi og er einn af stærstu píluframleiðendum í heimi núna. Þetta er risastórt fyrir alla þjóðina held ég,“ segir Alexander í sportpakkanum á Sýn í gærkvöldi.

„Maður hefur verið að keppa meira fyrir utan landssteinana og þeir sjá það og síðan vilja þeir reyna að stækka sinn markað hérna heima,“ segir pílukappinn en í næsta mánuði kemur út sérhönnuð píla sem er framleidd í nafni Alexanders.

„Núna getur maður hætt að fikta í pílusettinu og verið bara með sitt eigið,“ en píla Alexanders fer strax í sölu um miðjan september.

Fyrrum heimsmeistarinn Michael Smith er einnig á mála hjá Shots.

„Þeir hafa verið að sanka fleiri spilurum að sér núna sem eru svona við toppinn,“ segir kappinn en næstu mánuðir verða afdrifaríkir hjá honum. 

Hann fær til að mynd eitt tækifæri til að koma sér á heimsmeistaramótið í Ally Pally sem hefst í desember en Alexander vann til að mynda úrvalsdeildina í pílu á Sýn Sport sem fer aftur af stað í október.