Rifu sig upp eftir von­brigðin í gær og unnu Frakka eftir rosa enda­sprett

Íslenska liðið datt út í átta liða úrslitunum á móti Þjóðverjum í gær en vann 37-34 sigur á Frökkum í dag og spilar því um fimmta sætið á mótinu.

Íslenska liðið skoraði tuttugu mörk í fyrri hálfleiknum og leiddi 20-16 eftir hann. Frakkarnir náðu að jafna metin í 22-22 og voru svo komnir mest fjórum mörkum yfir í 33-29.

Það stefndi því í annað tapið í röð en íslensku strákarnir áttu frábæran endasprett og unnu síðustu átta mínútur leiksins 8-1.

Haukamaðurinn Freyr Aronsson skoraði 11 mörk og Valsarinn Gunnar Róbertsson var með níu mörk, þar af fjögur á lokakaflanum. Þá skoraði Framarinn Alex Unnar Hallgrímsson fjögur mörk og Valsarinn Logi Finnsson var með þrjú mörk.

Íslensku strákarnir klikkuðu á þremur vítaköstum í leiknum en það kom ekki að sök.

Leikurinn um fimmta sætið er á móti annaðhvort Króatíu eða Ungverjalandi á sunnudaginn en íslensku strákarnir hafa unnið bæði þessi lið fyrr á mótinu.