Lýsa eftir landnámshænu við KFC í Hafnar­firði

„Óvenjulegur flótti átti sér stað við Vallarbraut í Trönuhrauni í Hafnarfirði nú rétt í þessu. Ein af hænunum okkar sá sér leik á borði, slapp úr búrinu og hélt út í hinn stóra heim. Um er að ræða íslenska landnámshænu, svarta að lit. Vallarbraut er rétt hjá KFC og því er skiljanlegt að við höfum töluverðar áhyggjur af leiðarvali hennar!“ segir í tilkynningu frá Vallarbraut.

Þar eru akandi og gangandi vegfarendur á svæðinu beðnir um að sýna aðgát og hafa augun opin.

„Hænunnar er sárt saknað. Þótt landnámsblóðið kalli greinilega á frelsi og ævintýri viljum við fá hana heila heim aftur áður en hún nemur sér eigið land – eða ratar inn á kolrangan veitingastað. Þeir sem verða varir við svarta hænu í nágrenni Vallarbrautar, Trönuhrauns eða KFC eru vinsamlega beðnir um að hafa samband við Vallarbraut í síma 454-0050. Við lofum góðum móttökum, fullu sakaruppgjöri – og engri yfirheyrslu um ferðir hennar!“

Uppfært klukkan 22:39.

Hænan er fundin, samkvæmt tilkynningu frá Óskari Jónssyni.