Þekkt hnefa­leika­kona látin að­eins 26 ára gömul

Samkvæmt upplýsingum yfirvalda var ekið fram úr hinni 26 ára gömlu Rapp en bíllinn stöðvaði svo skyndilega og bakkaði á hana en hún var að hjóla með kærasta sínum.

Ökumaðurinn, hinn 31 árs gamli Charles Medina, hefur verið handtekinn og ákærður fyrir manndráp.

Samkvæmt skýrslu frá skrifstofu sýslumannsins er Medina sagður hafa ekið á ofsahraða fram hjá þeim og verið um það bil þrjátíu sentímetra frá því að aka á þau. Eftir að hjólreiðafólkið kallaði á hann og kastaði upp höndunum segja rannsóknarlögreglumenn að Medina hafi nauðhemlað, stöðvað, sett í bakkgír, gefið í afturábak og ekið á Hönnuh.

Hún var flutt í skyndi á sjúkrahús þar sem hún lést. Medina sagði rannsóknarlögreglumönnum að hann hefði talið að hjólreiðafólkið væri að reyna að veifa honum og sagðist ekki hafa séð Rapp fyrr en á síðustu stundu þegar hann bakkaði. Hann sagði lögreglumönnum að hann hefði verið á um 24 kílómetra hraða aftur á bak. Rannsóknarlögreglumenn segja að gögn á vettvangi, þar á meðal hemlunarför, og vitnisburður frá kærasta Rapp, samræmist því að ökutækið hafi bakkað hratt í átt að hjólreiðafólkinu.

Rapp keppti um WBC-heimsmeistaratitil kvenna í fjaðurvigt í júní en tapaði þar fyrir Tiöru Brown en eftir bardagann var árangur hennar á ferlinum voru átta sigrar, eitt tap og eitt jafntefli.

„Hún var einstakur hnefaleikakappi en umfram allt ómetanlegur meðlimur í hnefaleikafjölskyldu okkar,“ sagði Mauricio Sulaiman, forseti WBC, í yfirlýsingu.

Brown kallaði Rapp „besta dansfélaga sem ég hef mætt á atvinnumannaferli mínum“ og sagði að Rapp hefði beðið um eiginhandaráritun hennar í aðdraganda bardagans.

„Það gladdi mig innilega því við vorum að búa okkur undir stríð, en samt var hún að biðja um eiginhandaráritunina mína. Við háðum frábæran bardaga. Það var mér heiður að deila hringnum með henni,“ sagði Brown.

Rapp, sem var frá Indiana, keppti í frjálsum íþróttum áður en hún sneri sér að hnefaleikum. Hún gerðist atvinnumaður árið 2024 en starfaði áfram í fullu starfi sem eldvarna- og öryggiseftirlitsmaður.

„Hannah hafði varanleg áhrif á alla sem fengu tækifæri til að kynnast henni. Hún var hæfileikaríkur íþróttamaður, virtur meðlimur hnefaleikasamfélagsins og naut mikillar virðingar þeirra sem í kringum hana voru,“ sagði umboðsfyrirtæki hennar í yfirlýsingu og þar kom einnig fram:

„Við erum þakklát fyrir að hafa fengið að taka þátt í ferðalagi hennar og munum heiðra minningu hennar á næstu vikum.“