Strákarnir á­fram í milli­riðil á EM

Ísland hafði unnið Austurríki í fyrsta leik en tapað svo fyrir Spáni í öðrum leiknum. Ljóst lá fyrir að vinna þurfti Lettland í lokaleiknum til að komast áfram.

Ísland lenti í sérstökum vandræðum með Valdis Kalnins í liði Letta en hann skoraði 14 mörk. Ísland leiddi með tveimur mörkum í hálfleik, 16-14, og sá munur hélst til loka.

Leiknum lauk 31-29 og Ísland hafnar í öðru sæti riðilsins með fjögur stig. Lettar töpuðu öllum þremur leikjum sínum á mótinu.

Harri Haraldsson, leikmaður Aftureldingar, og Andri Erlingsson, sem gekk nýverið í raðir Kristianstad í Svíþjóð, voru markahæstir í íslenska liðinu með sjö mörk hvor.