Búinn að vera með martraðir af kvíða fyrir þessu

Óskar Ófeigur Jónsson skrifar 23. júní 2026 07:31

Már Gunnarsson opnaði sig um áhyggjur af aðgerðinni en lét svo vita að hún hefði gengið vel. @mar_gunnarsson

Sundmaðurinn öflugi Már Gunnarsson fór í aðgerð í gær til að laga gömul meiðsli eftir slys á æfingu. Þetta er í annað skiptið sem hann reynir að láta laga vandamálið og hann viðurkenndi að hann hafi kviðið mikið fyrir enda klúðraðist sams konar aðgerð fyrir nokkrum árum síðan,

Már sagði á samfélagsmiðlum sínum söguna af meiðslunum fyrir aðgerðina og þakkaði síðan fyrir allar kveðjurnar eftir hana.

„Það er sannarlega hægt að segja að það sé stór dagur hjá mér í dag. Fyrir tíu árum lenti ég í því óhappi að ég var að æfa flugspretti með froskalöppum og ég lenti beint á bakkanum með andlitið á mér. Síðan þá hef ég ekki getað andað almennilega með nefinu og þetta hefur hrjáð mig alveg rosalega mikið,“ sagði Már fyrir aðgerðina.

„Tveimur árum seinna fór ég til læknis sem sagðist geta lagað þetta og hann setti mig í aðgerð sem að síðan klúðraðist. Viðkomandi læknir missti síðan lækningaleyfið einhverju einu og hálfu ári síðar, þannig að þetta var mjög sérstakt,“ sagði Már.

„Núna er ég að fara í aðra aðgerð og já, hjá nýjum lækni sem á að vera rosalega fær og ég er að vonast til að við getum núna bara klárað þetta vandamál þannig að ég geti farið að anda aftur með nefinu,“ sagði Már.

„En ég get sagt ykkur það, ég var bókaður í þessa aðgerð fyrir fjórum mánuðum síðan og ég er búinn að vera með martraðir af kvíða fyrir þessu og já, ég er rosalega stressaður auðvitað bara út af fyrri reynslu. Ég man að síðast þegar ég fór í þessa aðgerð, sko, ég var bara mánuðinn eftir, það var bara algjör hryllingur,“ viðurkenndi Már sem vildi deila þessu með fylgjendum sínum.

Það var að venju stutt í húmorinn. „Það er mikilvægt að anda með nefinu, gott fólk,“ sagði Már en kom svo aftur inn eftir aðgerðina.

„Ég vildi bara segja hvað mér þótti fallegt að þessi öll skilaboðin sem þeir sendu mér út af myndbandinu mínu í morgun. Ég átti ekki von á svona miklum viðbrögðum en mér þótti virkilega vænt um það að heyra frá ykkur og vita að þið væruð að hugsa til mín. Læknarnir segja að aðgerðin hafi gengið vel og ég ætla ekki að segja að þetta hafi verið gaman en núna þarf ég bara að jafna mig, hvíla mig og vera rólegur,“ sagði Már.

Nú er bara að senda Má batakveðjur og vonandi kemur hann sterkari út úr þessu.