Sjáðu Elísa­betu vinna titilinn með fjögurra sentí­metra mun

Spennan var gífurleg en Elísabet, sem keppir fyrir Texas State, náði efsta sætinu þegar hún kastaði 73,19 metra í þriðju tilraun.

Anthonett Nabwe úr Minnesota hafði átt 72,68 metra kast í fyrstu tilraun og hún átti svo sitt besta kast í sjöttu og síðustu umferðinni, þegar hún virtist grýta sleggjunni nánast nákvæmlega jafnlangt og Elísabet hafði gert.

Þetta lokakast Nabwe var upp á 73,15 metra, eða fjórum sentímetrum styttra en besta kast Elísabetar sem þar með gat fagnað vel eins og sjá má.

Þær Nabwe og Elísabet voru þær einu sem náðu að kasta yfir 70 metrana og gerði Elísabet það þrisvar sinnum því sería hennar var: 69,80 m, 70,26 m, 73,19 m, 69,74 m, ógilt kast og 70,34 m.

Hún bætti sitt persónulega met um 30 sentímetra og færist nær Íslandsmeti Guðrúnar Karítasar Hallgrímsdóttur sem er 73,88 metrar. Báðar keppa þær á EM í Birmingham í ágúst þar sem afar fróðlegt verður að fylgjast með þeirra baráttu.

Arndís komst einnig í úrslit

Arndís Óskarsdóttir, sem keppir fyrir FIU, náði einnig afar góðum árangri á mótinu í Eugene í gær. Hún komst í níu manna úrslit, af 24 keppendum, og hafnaði að lokum í 8. sæti í spjótkasti, með 54,75 metra kasti.

Arndís náði sínu besta kasti í lokaumferðinni en hafði einnig kastað 54,22 metra í annarri tilraun. Hún var afar nálægt 6. sæti en vantaði nokkuð upp á verðlaunasæti því bronsverðlaunahafinn kastaði 60,16 metra og sigurkastið var upp á 60,87 metra.

Júlía Kristín Jóhannesdóttir varð svo í 23. sæti í 100 metra grindahlaupi en hún hljóp á 13,33 sekúndum í undanrásunum. Júlía er einnig skráð til leiks í sjöþraut á mótinu.