Stærstu af­rekin að koma öllum út úr húsi á tíma

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fólk fer að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Yfirleitt vakna ég alla daga fyrir 06:00, við búum svo vel að eiga mannlega vekjaraklukku sem er tveggja ára og hún kýs yfirleitt að grípa daginn snemma. Ég er reyndar mikil morgunmanneskja og því auðvelt að hoppa fram úr eftir smá kúr með litlu minni.

Ég vakna líka snemma um helgar og mér finnst mjög gott að vera komin á fætur á undan öllum öðrum á heimilinu. Að sitja með fyrsta kaffibollann í ró og næði áður en dagurinn fer af stað er líklega ein af mínum uppáhaldsstundum.“

Hvað er það fyrsta sem þú gerir á morgnana?

Ég byrja alltaf á að setja kaffið á. Það eru örugglega til betri og hollari leiðir til að vakna, ég hef auðvitað prófað sítrónuvatnið en það er eitthvað við fyrsta kaffibollann sem ég hlakka til að fá mér kvöldið áður.

Ég reyni að fara tvisvar til þrisvar sinnum í viku í hlaup eða aðra hreyfingu áður en vinnudagurinn hefst. Dagurinn verður einfaldlega betri þegar ég næ því. Núna þegar morgnarnir eru bjartir og fallegir er líka mun auðveldara að skella sér út að hlaupa. Annars snýst morgunrútínan að mestu um að undirbúa daginn með fjölskyldunni og koma öllum út úr húsi á réttum tíma sem er stundum stærra afrek en hlaupatúrinn sjálfur.“

Hvað á það til að hræða úr þér líftóruna?

„Köngulær, án nokkurs vafa. Ég skil ekki alveg af hverju, því ég er ekkert hrædd við önnur skordýr. En ef könguló birtist skyndilega þá hverfur öll skynsemi.“

Í hvaða verkefni ertu að vinna helst í þessa dagana?

„Þessa dagana erum við á fullu að undirbúa sumarherferðina okkar og það er alltaf líf og fjör sem fylgir því að skipuleggja sumarið. Dagarnir snúast um markaðsherferðir, viðburði og alls konar skemmtileg verkefni sem við viljum færa viðskiptavinum Hagkaups.

Mér finnst sérstaklega gaman að finna leiðir til að sýna starfsfólkið okkar meira, því á bak við öll sterk vörumerki er fólk og sögur sem vert er að segja frá.“

Hvernig skipuleggur þú þig í vinnu?

„Ég er mjög skipulögð á pappír og alltaf með alls konar lista, dagatöl og áminningar. To do-listinn minn er yfirleitt frekar langur, en ég hef lært að markmiðið er ekki endilega að klára allan listann á einum degi. 

Það er miklu mikilvægara að einbeita sér að forgangsmálunum og leyfa listanum að vera til stuðnings frekar en streituvaldur.

Síðan kemur raunveruleikinn stundum og breytir öllu á fimm mínútum.

 Markaðsmál eru oft þannig að maður þarf að vera bæði vel skipulagður og tilbúinn að bregðast hratt við þegar ný tækifæri eða verkefni koma upp. 

Það er einmitt það sem gerir starfið svo skemmtilegt.“

Hvenær ferðu að sofa á kvöldin?

„Ég reyni að vera komin upp í rúm um klukkan tíu, en það gengur misvel, sérstaklega á þessum árstíma þegar dagarnir eru svo bjartir og langir. Undanfarið hef ég meira að segja verið frameftir úti í garði, sem gerist ekki alveg á hverju kvöldi hjá mér. Það er eitthvað við birtuna sem gefur manni auka orku.

Svo finnst mér líka mjög notalegt að ná einum sjónvarpsþætti með manninum mínum í lok dags. Ég rembist stundum við að hanga vakandi til að klára þáttinn, sérstaklega eftir annasaman dag, en yfirleitt endar það þannig að ég sofna nánast um leið og höfuðið snertir koddann.“