Örn tekur við karlaliði Sel­foss

Örn er fyrrum leikmaður Selfoss hefur þjálfað meistaraflokk kvenna, U-lið karla og yngri flokka félagsins. Síðustu ár hefur hann einnig starfað sem íþróttastjóri handknattleiksdeildarinnar.

Hann stígur nú skrefið yfir til karlaliðsins, þar sem hann tekur við þjálfarastarfinu af Carlos Santos Martin, sem óskaði eftir starfslokum að loknu síðasta tímabili.

Selfoss voru nýliðar í Olís deildinni á síðasta tímabili en liðið endaði í 10. sæti og tryggði sér áframhaldandi veru í Olís deildinni á næsta tímabili.

„Mikil ánægja er með ráðningu Arnar sem mun leiða áframhaldandi uppbyggingu meistaraflokksins hjá okkur næstu árin,“ segir í tilkynningu Selfoss.

„Ég er mjög spenntur að takast á við þetta spennandi verkefni. Ég tek við góðu búi frá Carlosi en ég hinsvegar þekki þessa stráka vel, veit hvað í þeim býr og er fullviss um að þeir eigi mörg skref inni og það séu bjartir tímar framundan,“ sagði Örn í tilkynningu Selfoss.