Innlent

Þúsund mynda­vélar fylgjast með því sem fram fer á flug­vellinum

Kristján Már Unnarsson skrifar
Hafþór Bjartur Sveinsson er APOC-vaktmaður á Keflavíkurflugvelli. Fyrir aftan má sjá hluta myndavélaskjáinna í samhæfingarstjórnstöð flugvallarins.
Hafþór Bjartur Sveinsson er APOC-vaktmaður á Keflavíkurflugvelli. Fyrir aftan má sjá hluta myndavélaskjáinna í samhæfingarstjórnstöð flugvallarins. Egill Aðalsteinsson

Sennilega er ekkert svæði á Íslandi eins vel vaktað og Keflavíkurflugvöllur. Um eittþúsund eftirlitsmyndavélar fylgjast með því sem fram fer á flughlöðum og inni í flugstöðinni.

Í kvöldfréttum Sýnar kynnumst við einum anga af margbrotinni starfsemi á vellinum. Við kíkjum bak við luktar dyr í Leifsstöð, inn í bakrými sem kallast APOC, en fjallað var um það í þætti Flugþjóðarinnar um Keflavíkurflugvöll.

„APOC stendur fyrir „airport operations center“. Á íslensku væri það samhæfingarstjórnstöð,“ segir Hafþór Bjartur Sveinsson, APOC-vaktmaður á Keflavíkurflugvelli.

Úr APOC-samhæfingarstjórnstöðinni í Leifsstöð.Egill Aðalsteinsson

„Hérna samhæfum við reksturinn á flugvellinum. Það varðar aðallega úthlutun innviða.“

Eins og því að úthluta stæðum fyrir flugvélar.

Í samhæfingarstjórnstöðinni starfa að jafnaði um tuttugu manns á daginn og niður í fimm á nóttunni. Þar fylgjast starfsmenn með miklum fjölda skjáa.

Svo viðkvæm þykja öryggismálin að okkur var ekki leyft að mynda suma skjáina. Við leyfum okkur að fullyrða að fáir staðir á Íslandi séu eins vel vaktaðir og flugvöllurinn.

Hlutverk APOC er meðal annars að úthluta flugvélum stæðum við flugstöðina.Egill Aðalsteinsson

-Er þetta kannski bara heilinn eða hjartað í flugvellinum?

„Já, þetta er svolítið svona hjartað í flugvellinum. Við reynum að svona.. að það sé allt miðlægt stýrt héðan. Við samhæfum allt sem þarf að samhæfa,“ segir Hafþór.

Þaðan er fylgst með nánast hverju rými í flugstöðinni en einnig því sem fram fer utanhúss. Það þekkja starfsmenn á flughlaðinu.

„Það er enginn í eins miklu eftirliti og við. Þetta eru þrjúhundruð og eitthvað myndavélar sem eru að fylgjast með okkur,“ segir Ólafur Guðbergsson, deildarstjóri farþegaaksturs á Keflavíkurflugvelli.

Ólafur Guðbergsson er deildarstjóri farþegaaksturs á flughlöðunum.Egill Aðalsteinsson

„Allt regluverk á flughlaði er það mikið. Það verða allir að fara eftir því. Þetta gengi ekki upp nema þetta væri svona í föstum skorðum, allt regluverkið,“ segir Ólafur.

Eftirlitsmyndavélarnar eru raunar mun fleiri, að sögn Hafþórs.

„Án þess að ég viti nákvæma tölu þá ætla ég að skjóta á að þær séu í kringum þúsund, eitthvað svoleiðis.“

Starfsmenn APOC vakta um eittþúsund myndavélar.Egill Aðalsteinsson

-Þúsund myndavélar?

„Innanhúss og utanhúss, allskonar.“

-Með flugvellinum?

„Já.“

-Þetta er nú dálítið flókið að fylgjast með þeim öllum?

„Það er ansi flókið. En maður venst því ansi hratt líka,“ segir Hafþór Bjartur Sveinsson hér í sjónvarpsfréttinni:

Nýjasta þáttaröðin um Flugþjóðina er sýnd í opinni dagskrá Sýnar þessa dagana, á þriðjudagskvöldum og síðdegis á sunnudögum. Áskrifendur geta séð alla þættina á streymisveitunni Sýn+.

Í kynningarstiklu má sjá dæmi um efni þáttanna sjö í þriðju seríu Flugþjóðarinnar:

Keflavíkurflugvöllur Flug Flugþjóðin Öryggi á ferðamannastöðum

Tengdar fréttir

Farþegar sjá ekki fólkið sem gegnumlýsir farangurinn

Flugfarþegar sem sjá handfarangur sinn fara í gegnum öryggisskoðun á Keflavíkurflugvelli átta sig fæstir á því að starfsmennirnir sem rýna í innihaldið sitja á allt öðrum stað í flugstöðinni. Sömu starfsmenn skoða einnig hvað leynist í stóru töskunum sem farþegar innrituðu.

„Það gerist ekkert ef ljósin eru slökkt“

„Það gerist ekkert ef ljósin eru slökkt, sérstaklega ef það er myrkur,“ svarar Jón Grétar Herjólfsson, rekstrarstjóri raftæknideildar Keflavíkurflugvallar, og hlær þegar við spyrjum um mikilvægi flugbrautaljósanna í rekstri vallarins. Flugmennirnir treysta á ljósadýrðina til að hitta á réttan stað.

Smíða tengibyggingu sem verður hjarta Leifsstöðvar

Ein stærsta framkvæmd í landinu á næstu árum verður enn frekari stækkun flugstöðvarinnar á Keflavíkurflugvelli, sem Isavia hyggst hefja á þessu ári. Þetta er smíði 22 milljarða króna tengibyggingar sem verða á hjarta Leifsstöðvar.

Mest lesið


Fleiri fréttir

Sjá meira


×

Mest lesið