Bjarki Már ung­verskur meistari fjórða árið í röð

Vezprem varð í kvöld ungverskur meistari í þrítugasta skipti eftir frábæran endurkomusigur á Pick Szeged í seinni leik liðanna í úrslitum. Bjarki Már var með þrjú mörk í leiknum og voru tvö þeirra af vítalínunni. Janus Daði var aðeins með tvö mörk og náði sér ekki almennilega á strik í leiknum.

Leikurinn var heilt yfir mjög jafn en undir lok fyrri hálfleiks byrjaði Pick Szeged að sækja í sig veðrið og voru þrem mörkum yfir í hálfleik 19-16.

Leikmenn Vezprem komu sterkir inn í seinni hálfleikinn og munur liðanna var aðeins tvö eða þrjú mörk en Pick Szeged var alltaf yfir. Síðan kemur átta mínútna kafli þar sem Pick Szeged skorar ekki mark og á sama tíma skorar Vezprem fimm mörk og allt í einu eru Bjarki Már og félagar í bílstjórasætinu.

Fjögurra marka forysta þegar átta mínútur voru eftir reyndist of erfitt fyrir Pick Szeged að leiðrétta og Vezprem sigldu sigrinum heim þar sem lokatölur leiksins voru 36-34.

Bjarki Már endar feril sinn hjá Vezprem vel en hann er á förum frá félaginu eftir tímabilið. Hann gekk til liðs við félagið árið 2022 og hefur unnið deildina öll sín ár hjá félaginu eða fjórum sinnum í röð.