Fékk hræði­legar fréttir nokkrum dögum fyrir HM

„Fyrirgefið, ég hef ekki svarað neinum enn þá, þetta eru mjög erfiðir tímar hjá mér. Krossbandið er farið,“ skrifaði Flores á samfélagsmiðla.

„Ég vil þakka öllum fyrir öll skilaboðin. Ég hef ekki verið í símanum eða skoðað skilaboðin, en ég lofa að svara öllum og ég kann virkilega að meta umhyggjuna. Ég kem sterkari til baka,“ skrifaði Flores sem meiddist í leik með mexíkóska liðinu Tigres UANL.

Flores var að rekja boltann innan í vítateig andstæðinganna þegar hann virtist festa hægri fótinn í grasinu. Hann fann mikinn sársauka og féll öskrandi í jörðina. Læknateymi Tigres studdi Flores af velli en hann gat ekki stigið í fótinn.

Leikmaðurinn meiddist aðeins 15 mínútum eftir að hafa komið inn á völlinn sem varamaður í seinni hálfleik.

Jesse Marsch, landsliðsþjálfari Kanada, staðfesti fréttirnar á blaðamannafundi á sunnudag og sagði að hann og liðið væru niðurbrotin fyrir hönd Flores. Marsch hafði valið Flores í 26 manna HM-hópinn á föstudag, aðeins degi síðar var HM-draumur hans dáinn.

Flores valdi upphaflega að spila fyrir Mexíkó en hann sótti síðan um leyfi hjá FIFA til að ganga til liðs við kanadíska karlalandsliðið. Flores fæddist í Kanada og á mexíkóskan föður, sem gerði honum kleift að spila fyrir bæði löndin.

Marsch kallaði Flores upphaflega í janúarglugganum til að taka þátt í vináttuleik gegn Gvatemala, en hann gat ekki tekið þátt í æfingabúðunum þar sem landsliðsskipti hans höfðu ekki gengið í gegn.

Flores lék loks sinn fyrsta leik með Kanada í landsleikjahléinu í mars og kom við sögu í leikjum gegn Íslandi og Túnis.