Kol­beinn enn taplaus eftir blóðugan bar­daga í Köben

Kolbeinn byrjaði þó bardagann ekki vel í kvöld og fékk snemma skurð við aðra augabrúnina sem blóðið fossaði svo úr eftir því sem leið á bardagann.

Hann náði sér hins vegar vel á strik þegar á leið og sendi Sour ítrekað í gólfið en Tékkinn neitaði þó lengi vel að gefast upp, eða þar til í fimmtu lotu að hann varð að játa sig sigraðan.

Kolbeinn hefur því unnið alla tuttugu bardaga sína, þar af 14 með rothöggi eða tæknilegur rothöggi, en hann var ekkert sérstaklega ánægður með sig í viðtali sem sýnt var í beinni útsendingu Sýnar Sport frá kvöldinu. Þar hrósaði Kolbeinn andstæðingi sínum en sagðist sjálfur einfaldlega aldrei gefast upp.

Aðspurður hvernig hann hefði unnið sig út úr vandræðunum í byrjun svaraði Kolbeinn sposkur: „Þjálfararnir mínir sögðu mér bara að hætta að sökka svo ég hætti að sökka.“

Vonir standa til þess að von bráðar keppi Kolbeinn svo í fyrsta sinn atvinnumannabardaga heima á Íslandi en fresta þurfti þeim áformum í vor þegar hann meiddist.

Emin Kadri Eminsson vann fyrr í kvöld sinn fjórða atvinnumannabardaga þegar hann vann Ungverjann Erik Mato, í veltivigtarbardaga, á einróma dómaraúrskurði eftir fjögurra lotu bardaga.