Fótbolti

Íranska liðið spilar í Banda­ríkjunum en þarf að gista í Mexíkó

Ágúst Orri Arnarson skrifar
Íranska landsliðið hefur æft í Tyrklandi í aðdraganda mótsins og fær loksins að spila æfingaleik bráðlega eftir langa bið. 
Íranska landsliðið hefur æft í Tyrklandi í aðdraganda mótsins og fær loksins að spila æfingaleik bráðlega eftir langa bið.  Orhan Cicek/Anadolu via Getty Images

Íranska fótboltalandsliðinu verður ekki leyft að dvelja í Bandaríkjunum á meðan heimsmeistaramótinu stendur, þrátt fyrir að liðið eigi að spila þar þrjá leiki. Íranar munu gista í Mexíkó og ferðast milli staða á leikdögum.

Claudia Sheinbaum, forseti Mexíkó, staðfesti þetta við Reuters eftir að FIFA tilkynnti formlega í gær að æfingabúðir íranska landsliðsins yrðu færðar til Tijuana í Mexíkó.

„Við höfum enga ástæðu til að neita þeim dvalarleyfi í Mexíkó,“ sagði forsetinn einnig.

Þátttaka Íran á HM hefur verið í mikilli óvissu síðan Bandaríkin og Ísrael réðust inn í Íran í lok febrúar. Fyrst óskaði Íran eftir því að leikir liðsins yrðu færðir til Mexíkó en leyfi FIFA fékkst ekki fyrir því.

Bandaríkjaforsetinn Donald Trump stakk síðan upp á því að Ítalía myndi taka sæti Íran á mótinu en bæði ítalska knattspyrnusambandið og FIFA stilltu sér harðlega upp á móti því.

Í síðasta mánuði lenti forseti íranska knattspyrnusambandsins, Mehdi Taj, í vandræðum við vegabréfsinnritun í Kanada og var vísað úr landi fyrir ársþing FIFA.

Dagskrá mótsins hefur hins vegar ekki verið breytt hvað liðin eða leikina varðar. Íran á leiki gegn Nýja-Sjálandi þann 15. júní í Los Angeles og gegn Belgíu 21. júní í sömu borg áður en liðið mætir Egyptalandi í Seattle þann 26. júní.

HM 2026 í fótbolta Íran Árásir Bandaríkjanna og Ísraels á Íran

Tengdar fréttir

Írönum vísað úr landi fyrir ársþing FIFA

Yfirmönnum íranska knattspyrnusambandsins var vísað burt af landamæraeftirliti Kanada. Íran mun því ekki eiga fulltrúa á ársþingi FIFA sem fer þar fram um helgina.

Trump vill fá Ítalíu á HM í stað Írans

Sendifulltrúi Donalds Trump Bandaríkjaforseta hefur farið þess á leit við FIFA, alþjóða knattspyrnusambandið, að Ítölum verði boðin þátttaka á HM í fótbolta í sumar í stað Írans.

Mest lesið


Fleiri fréttir

Sjá meira


×

Mest lesið