Öðrum hring Reykjanesmótsins af­lýst

Mikill vindur og væta er á svæðinu, og ekki talið skynsamlegt að leika golf í þessum aðstæðum, eftir því sem kemur fram á heimasíðu GSÍ.

Enn er stefnt að því að leika lokahring mótsins á Hólmsvelli á morgun. Mótið verður því stytt í 36 holur.

Reykjanesmótið er fyrsta mót tímabilsins á GSÍ mótaröðinni. Aðstæður voru krefjandi í gær þegar fyrsti hringur fór fram í miklum vindi.

Hákon Örn Magnússon lék best allra í gær og leiðir karlaflokkinn á fjórum höggum undir pari. Hákon lék hringinn á 67 höggum, fékk þrjá fugla, einn skolla og endaði daginn á glæsilegum erni á átjándu holu.

Fjórir kylfingar eru jafnir í öðru sæti í karlaflokki, á einu höggi undir pari. Þar á meðal eru Axel Bóasson, þrefaldur Íslandsmeistari í golfi, og Tómas Eiríksson Hjaltested, ríkjandi stigameistari karla.

Perla Sól Sigurbrandsdóttir og Fjóla Margrét Viðarsdóttir eru jafnar á toppi kvennaflokksins, báðar á fjórum höggum yfir pari.

Pamela Ósk Hjaltadóttir er höggi á eftir þeim í þriðja sæti, á fimm höggum yfir pari.