„Vaxandi meinsemd í íslensku samfélagi“

Valur Páll Eiríksson skrifar 15. maí 2026 11:11

Arnar stendur með Hafdísi og segir bakslag hafa orðið í réttindabaráttu minnihlutahópa. Þörf sé á samfélagslegu átaki. Samsett/Vísir

Arnar Pétursson, landsliðsþjálfari kvenna í handbolta, gagnrýnir harðlega framkomu stuðningssveitar ÍBV í garð landsliðsmarkvarðarins Hafdísar Renötudóttur í leik liðanna á dögunum. Hann kallar eftir viðbrögðum vegna bakslags í réttindabaráttu minnihlutahópa hérlendis.

Hafdís tjáði sig stuttlega á samfélagsmiðlum líkt og greint var frá á samfélagsmiðlum í morgun. Hafdís varð fyrir fordómum í fyrri leik ÍBV og Vals í Vestmannaeyjum í úrslitaeinvíginu en í síðari leik liðanna í Eyjum í því einvígi vann Valur sigur og tryggði liðinu Íslandsmeistaratitilinn fjórða árið í röð.

Viðkomandi áhorfandi sem kallaði að Hafdísi var settur í bann og ÍBV sektað vegna málsins.

„Hinsegin fólk verður fyrir aðkasti á hverjum degi og ég er hvorki sú fyrsta né síðasta sem upplifir það. Þetta úrslitaeinvígi braut mig. Ég mætti samt. Íslandsmeistarar 2026,“ skrifar Hafdís á Instagram.

Arnar Pétursson, landsliðsþjálfari Íslands, tjáði sig um málið á Facebook-síðu sinni í morgun. Hann sagði það vera „svartan blett á úrslitakeppninni“ og að taka þyrfti á samfélagsátaki að halda.

„Bakslag hafi orðið í baráttu minnihlutahópa“ sem sé „því miður vaxandi meinsemd í íslensku samfélagi þökk sé ákveðnum pólitískum öflum og lýðskrumurum“ segir Arnar meðal annars.

„Við þurfum að þora að taka slaginn gegn þessum öflum sem ala á ótta og tryggja að raddir samkenndar, jafnréttis og frelsis nái í gegn,“ segir hann enn fremur en færsluna í heild má sjá að neðan.

Færsla Arnars:

Til hamingju Valsstelpur með vel verðskuldaðan titil.

Þessi ömurlega framkoma stuðningsmannasveitar ÍBV sem veittist að leikmönnum Hauka og Vals með niðrandi hætti, líkamssmánun og ósmekklegum fordómum í garð samkynhneigðra er svartur blettur á annars flottri úrslitakeppni. Þessi hegðun er óásættanleg.

Hér þarf að bregðast við. Við sem samfélag höfum á ákveðin hátt brugðist.

Eftir áratuga árangur í jafnréttismálum hefur orðið bakslag í baráttu minnihlutahópa. Hatursorðræða, þar sem ráðist er að einstaklingi eða hópi á grundvelli kynþáttar, litarhafts, trúar, kyns eða kynhneigðar er því miður vaxandi meinsemd í íslensku samfélagi þökk sé ákveðnum pólitískum öflum og lýðskrumurum.

Við þurfum að þora að taka slaginn gegn þessum öflum sem ala á ótta og tryggja að raddir samkenndar, jafnréttis og frelsis nái í gegn.

Því þrátt fyrir bakslag er Ísland ennþá fallegt og frjálslynt samfélag.

Gerum okkar besta til að halda því þannig.

Út með hatrið – inn með ástina

Olís-deild kvenna Valur ÍBV