„Við áttum þetta skilið“

Valsmenn voru frábærir í fyrri hálfleik og náðu mest sex marka forystu. Sú forysta hefði hæglega getað verið meiri, en FH beit frá sér í seinni hálfleik og var leikurinn æsispennandi á lokakaflanum. Valsmenn unnu að lokum með einu marki, 27-26. En hvernig gerir Ágúst leikinn upp?

„Mikil spenna í þessu. Við byrjuðum mjög sterkt, helvíti öflugir í fyrri hálfleik. Mér fannst algjör óþarfi að við værum ekki meira yfir í hálfleik. Við vorum sex mörkum yfir og við fáum skrítna tvo tveggja mínútna dóma undir lokin og svo koma þeir með áhlaup. Auðvitað eru þeir bara gríðarlega sterkir, en við sýndum bara mikinn karakter og náðum að loka þessu. Ég er gríðarlega ánægður með strákana.“

Aðspurður hvað það hafi verið sem hafi ráðið úrslitum í leiknum, þá hafði Ágúst þetta að segja.

„Orkustigið var mjög hátt hjá okkur. Mér fannst við mjög kraftmiklir í byrjun og varnarleikurinn á köflum mjög sterkur. Við komum aðeins ofar á þá og unnum þá svolítið af ódýrum boltum og náðum að keyra á þá, sérstaklega framan af leik og það var mjög mikilvægt.“

Valur hefur átt frábært tímabil, Íslands- og deildarmeistarar, en hvernig gerir Ágúst upp sitt fyrsta tímabil með karlalið félagsins?

„Ég er mjög ánægður. Við erum deildarmeistarar og Íslandsmeistarar, það er bara frábært. Við auðvitað bættum okkur mikið innan tímabilsins, við byrjuðum ekkert rosalega sannfærandi. Við Róbert [Gunnarsson] vorum náttúrlega bara að taka við liðinu og það bara tók tíma að koma okkar áherslum að. Ég er að vinna með frábærum þjálfurum, bæði Róberti og Jóhanni Inga Gunnarssyni. Við erum með góðan styrktarþjálfara, sálfræðing og sjúkraþjálfara. Við erum með frábært teymi og allir að vinna mjög góða vinnu. Ég er mjög heppin að hafa gott fólk í kringum mig.“

Svo sneri Ágúst sér að leikmannahópi sínum og þá sérstaklega að eins efnilegasta leikmanns landsins, Gunnars Róbertssonar.

„Svo erum við með frábæran leikmannahóp, bæði mjög unga og efnilega stráka. Oft á tíðum finnst mér sem dæmi Gunnar Róbertsson ekki fá nægilega mikla athygli. Hann er bara 17 ára og talað um hann eins og hann sé 35 ára. Hann er bara búinn að vera einn jafn besti leikmaður deildarinnar, bæði í vörn og sókn. Svo erum við auðvitað með reynslubolta eins og Róbert Aron og Björgvin og fleiri. Bara góð blanda.“

„Við áttum þetta skilið,“ sagði Ágúst að lokum í fagnaðarlátunum að Hlíðarenda.