Ís­lands­meistari gegn uppeldisfélaginu í síðasta leiknum á ferlinum

Magnús Óli fékk þungt höfuðhögg og heilahristing í þriðja leik liðanna. Óttast var að tímabilinu væri lokið hjá honum en hann sneri aftur í oddaleiknum, var næstmarkahæstur hjá Val með 4 mörk og stóð uppi sem Íslandsmeistari.

Hann segir ekkert annað hafa komið til greina en að spila þennan síðasta leik á ferlinum.

„Nei. Ég fékk leyfi frá lækni og var ekki með nein einkenni. Ég prófaði í gær og allt í góðu, þannig að ég ákvað bara að kýla á þetta,“ sagði Magnús í viðtali við Þorstein Hjálmsson eftir leik. 

Sigurinn í oddaleiknum gegn FH skilaði sér eftir mikla spennu. Valur byrjaði vel og leiddi mest með sex mörkum í fyrri hálfleik en FH barðist til baka í seinni hálfleik og jafnaði leikinn. Valur náði svo forystunni á ný og vörnin skilaði sigrinum þegar hún lokaði á lokasókn FH.

„Þetta er bara ótrúlegt lið. Það voru allir á milljón allan tímann. Við náðum góðu forskoti, hefðum getað komist í sjö en missum forskotið niður í fjögur fyrir hálfleik. Byrjum seinni hálfleik frekar illa, en við erum alltaf með þessi mörk í okkur. Svo skrúfuðum við upp vörnina í lokin og lokuðum þessu.“

Hvernig fagna Valsmenn þessum titli?

„Við fögnum þessu í Fjósinu í kvöld, eitthvað inn í helgina og alveg fram á sumar,“ sagði Magnús að lokum. Hann verður 34 ára á morgun og mun vakna sem Íslandsmeistari en skórnir verða væntanlega á leið upp í hillu.