Sjáðu fyrirliðann Tryggva taka við Evrópubikarnum

Bilbao Basket er fyrsta liðið til að verða Evópubikarmeistari tvisvar í röð. Liðið hafði betur gegn PAOK frá Grikklandi í tveggja leikja einvígi og tryggði sér meistaratitilinn með 89-74 sigri á heimavelli í gær.

Fyrirliðinn Tryggvi var framlagshæstur hjá Bilbao. Hann skoraði úr öllum fjórum skotum sínum úr opnum leik og alls níu stig, reif til sín flest fráköst eða sjö talsins, og var einn af þeim sem gáfu flestar stoðsendingar eða fimm.

Eftir leik tók hann svo fyrstur við bikarnum fyrir hönd síns liðs. Tryggvi var gerður að fyrirliða liðsins þegar Xavi Rabaseda lagði skóna á hilluna í fyrra. 

Tryggvi þakkaði stuðningsmönnum síðan sérstaklega fyrir þeirra framlag til sigursins.

„Þetta var mjög erfiður en líka fallegur leikur… Á erfiðu tímunum, eins og í byrjun leiks, fundum við fyrir stuðningnum. Við vissum að við þyrftum að halda áfram að berjast til að komast aftur á þennan stall. Ég er ótrúlega ánægður með strákana og allt sem þeir lögðu í þetta,“ sagði Tryggvi í viðtali við AS eftir leik.

Verðmætasti leikmaður úrslitakeppninnar, Darrun Hilliard, steig léttan dans með Tryggva. 

Á blaðamannafundi eftir leik ruddust svo allir leikmenn inn og frussuðu freyðivíni yfir þjálfarann.