Ber­lín batt enda á sigur­göngu læri­sveina Guð­jóns Vals

Gummersbach hafði gengið ótrúlega vel að undanförnu og liðið hélt meira að segja áfram að vinna leiki þó lykilmaðurinn Julian Köster hefði meiðst. Það hlaut þó að koma að því og tap varð niðurstaðan gegn ríkjandi Þýskalandsmeisturunum í dag.

Heimamenn í Berlín hófu leikinn vel og skoruðu fyrstu þrjú mörkin. Þeir leiddu síðan með þremur til fjórum mörkum alveg fram í seinni hálfleik, þegar Elliði Snær Viðarsson jafnaði metin 15-15.

Þá tóku Berlínarbúar hins vegar við sér á ný og sigldu fram úr þar til sigurinn var í höfn.

Mathias Gidsel fór mestan og skoraði 11 mörk fyrir Fuchse Berlin. Elliði Snær Viðarsson skoraði 4 mörk fyrir Gummersbach og var næstmarkahæstur á eftir Kay Smits með 5 mörk. Teitur Örn Einarsson kom engu marki á blað fyrir Gummersbach.

Eftir úrslit dagsins er Fuchse Berlin sex stigum frá toppliði Magdeburg sem á leik til góða. Gummersbach er í 4. sæti deildarinnar, þremur stigum frá Fuchse Berlin.