Besta sætið: Gamli skólinn ekki hrifinn af flagaraklút Sápa

Stefán Árni, gjarnan kallaður Sápi af samstarfsfélögum, mætti í Valsheimilið í gær með svokallaðan flagaraklút um hálsinn. Sá féll ekki vel í kramið hjá gamla skólanum en hann fékk grænt ljós frá Hermanni Haukssyni, tískusérfræðingi Körfuboltakvölds.

„Þetta er fashion,“ segir Sápi í þætti dagsins og fer ítarlega yfir söguna á bak við klútinn.

Valur vann frækinn sigur á Keflavík í leiknum og mun spila við Grindavík í undanúrslitum Bónus-deildar karla. Hin rimman er á milli Stjörnunnar og Tindastóls.

Undanúrslitin í Bónus kvenna hófust í gær er Grindavík vann Njarðvík í fyrsta leik. Haukar taka svo á móti Keflavík í kvöld.

Það var risalandsleikur á laugardag þegar Ísland spilaði við England. Stelpurnar okkar voru svo nálægt því að taka stig af Evrópumeisturunum. Glódís Perla bætti landsleikjametið í Dalnum og verður áhugavert að sjá hvað hún nær mörgum leikjum á endanum.

Stórleikur leiktíðarinnar í enska boltanum fór fram í gær og strákarnir í Besta sætinu eru ekki bjartsýnir fyrir hönd Arsenal í framhaldinu.

Besta sætið er hlaðvarp íþróttadeildar Sýnar og kemur út alla virka daga. Það er aðgengilegt á öllum helstu hlaðvarpsveitum.