„Ekki til betri skemmtun en þetta“

„Ég held að þetta hafi aðallega snúist um það að við héldum alltaf áfram og vorum bara að berjast við að halda fókus,“ sagði Sigursteinn eftir sigur FH-inga í kvöld.

„Þetta eru bara þannig leikir að það munar engu. Varnarlega erum við sterkir, Danni (Daníel Freyr Andrésson) kom sterkur inn og Birkir (Benediktsson) var frábær. Hann var ómetanlegur fyrir okkur í dag. Annars var þetta bara liðsheild, liðsheild og aftur liðsheild.“

Þá tók Sigursteinn undir að það væri gott að fá framlag frá mörgum leikmönnum í kvöld, en var þó ekki sammála því að Garðar Ingi Sindrason, sem oft og tíðum hefur dregið vagninn sóknarlega, hafi ekki skilað sínu í kvöld. Garðar skoraði ekki mark fyrir FH í kvöld, en bjó þó til fjögur fyrir liðsfélaga sína.

„Ég er bara pínu ósammála. Garðar er búinn að setja markið ótrúlega hátt, enhann er bara FH-liðinu svo gríðarlega mikilvægur. Þú sérð það ekkert alltaf á einhverri tölfræði eða skoruðum mörkum. Hann er bara liðinu gríðarlega mikilvægur og hann er að taka alvöru framfararskref í því að leiða lið eins og FH-liðið áfram í svona einvígi.“

Hann segir einnig að liðið þurfi að læra af leiknum í kvöld til að geta klárað einvígið á Ásvöllum á föstudaginn.

„Við þurfum að sýna að við höfum lærat eitthvað af síðasta leik í Krikanum. Ekki það að við höfum komið eitthvað lélegir í síðasta útileik, en við þurfum að mæta ennþá klárari og með ennþá betri fókus en þá. Við þurfum að taka þetta síðasta skref með fólkinu okkar og ég vil bara hvetja alla FH-inga til að mæta á föstudaginn því það er ekki til betri skemmtun en þetta,“ sagði Sigursteinn að lokum.