„Skemmtilegustu leikirnir að spila“

Ingvi Þór Sæmundsson skrifar 14. apríl 2026 15:45

Hinn átján ára Garðar Ingi Sindrason er lykilmaður í liði FH sem freistar þess að slá erkifjendur sína, Hauka, út í undanúrslitum Olís-deildar karla. vísir/sigurjón

Markahæsti leikmaður FH í vetur, Garðar Ingi Sindrason, bíður spenntur eftir þriðja leik FH og Hauka í undanúrslitum Olís-deildar karla í handbolta. Hann segir leiki þessara liða alltaf einstaka.

FH vann fyrsta leikinn gegn Haukum, 27-21. Staðan var jöfn, 17-17, þegar ellefu mínútur voru eftir en þá gáfu FH-ingar í og sigu fram úr erkifjendum sínum.

Haukar svöruðu fyrir sig með fimm marka sigri í öðrum leik liðanna á Ásvöllum, 27-22. Haukar reyndust sterkari undir lokin og jöfnuðu einvígið í 1-1.

Liðin mætast í þriðja sinn í kvöld, í Kaplakrika, og ljóst er að sigurvegarinn kemur sér í kjörstöðu til að tryggja sér sæti í úrslitaeinvíginu um Íslandsmeistaratitilinn. Þar verður andstæðingurinn Valur.

„Þetta leggst bara gríðarlega vel í mig. Mikil tilhlökkun og við erum heldur betur klárir,“ sagði Garðar í samtali við íþróttadeild.

Hann skoraði sjö mörk í fyrsta leiknum gegn Haukum en sex í leik tvö. Garðar segir helsta muninn milli leikjanna tveggja vera frammistöðu markvarðanna.

„Það var auðvitað markvarslan. Hann [Aron Rafn Eðvarðsson] átti stórleik hjá þeim í leik tvö og hann [Jón Þórarinn Þorsteinsson] átti stórleik hjá okkur í leik eitt. Þetta lá svolítið þar myndi ég segja,“ sagði Garðar.

Garðar fær óblíðar móttökur frá varnarmönnum Hauka.vísir/anton

FH og Haukar eru svarnir fjendur og grunnt á því góða milli liðanna. Garðar segir ekkert jafnast á við Hafnarfjarðarslagi.

„Þetta eru mjög sérstakir leikir og auðvitað skemmtilegustu leikirnir að spila. Það er alltaf mikil harka og mikið af áhorfendum á þessum leikjum. Þetta er svolítið öðruvísi en auðvitað bara geggjað,“ sagði Garðar.

En hvað þarf helst að varast hjá Haukum?

Það er auðvitað þarna á miðjunni hjá þeim, Freyr. Hann er búinn að vera gríðarlega góður í báðum leikjunum. Svo má Aron í markinu hjá þeim ekki detta í gang,“ svaraði Garðar.

Umræddur Freyr er leikstjórnandi Hauka og lykilmaður í þeirra liði þrátt fyrir að vera aðeins sautján ára, fæddur 2008. Garðar er fæddur 2007 en þeir Freyr hafa marga hildina háð, fyrst í yngri flokkunum og nú í meistaraflokki.

Freyr Aronsson er prímusmótorinn í sóknarleik Hauka.vísir/

„Jú, einmitt. Ég og Freyr höfum verið að kljást bara síðan í áttunda flokki þannig að það er bara gaman,“ sagði Garðar.

Leikurinn í kvöld er sjötti leikur FH og Hauka á þessu tímabili. FH-ingar unnu báða leikina í Olís-deildinni en Haukar unnu leik liðanna í undanúrslitum Powerade-bikarsins. Þau eru svo með sitt hvorn sigurinn í einvíginu í undanúrslitunum um Íslandsmeistaratitilinn.

Leikur FH og Hauka hefst klukkan 19:30 í kvöld og verður í beinni textalýsingu á Vísi.

Olís-deild karla FH Haukar

Mest lesið

Fleiri fréttir