Guð­jón Valur missir besta leik­mann liðsins í slæm meiðsli

Gummersbach er á ótrúlegri sigurgöngu í þýsku deildinni og vann um helgina sinn tíunda deildarsigur í röð, 32-24 gegn Wetzlar. Liðið komst þar upp í fjórða sæti deildarinnar og er í baráttu um Evrópusæti við risana fjóra: Magdeburg, Flensburg, Fucshe Berlin og Kiel.

Athygli vakti að Julian Köster, landsliðsmaður Þýskalands og fyrirliði Gummersbach, var ekki með í þeim leik. Hann var með skaddað liðband og þurfti að gangast undir aðgerð í gær.

Óvíst er hversu lengi Köster verður frá en mögulega mun Gummersbach verða án hans í síðustu sjö leikjum tímabilsins. Þar með gæti Köster hafa spilað sinn síðasta leik fyrir Gummersbach því í sumar skiptir hann yfir til Kiel.

Ljóst er að Köster verður sárt saknað en hann er ekki bara fyrirliði heldur framlagshæsti leikmaður liðsins, með flestar stoðsendingar (87) og næstflest mörk (125) á tímabilinu. 

Mikið mun nú mæða á Miro Schluroff en íslensku landsliðsmennirnir Elliði Snær Viðarsson og Teitur Örn Einarsson munu líka leggja sitt af mörkum fyrir Gummserbach.