Dembélé með aðra tvennu gegn Toulouse

PSG hvíldi nokkra lykilleikmenn í dag fyrir Meistaradeildarleikinn gegn Liverpool á þriðjudag en Dembélé var í byrjunarliðinu.

Gullboltahafanum líður líka greinilega vel gegn Toulouse því hann hefur skorað tvennu í báðum leikjunum gegn liðinu á þessu tímabili.

Dembélé var reyndar óheppinn að skora ekki þrennu í kvöld. Eftir að hafa komið PSG yfir í tvígang í fyrri hálfleik, með mörkum á 23. og 33. mínútu, kom Dembélé boltanum aftur í netið í upphafi seinni hálfleiks en markið var dæmt af vegna rangstöðu.

Rasmus Nicolaisen skoraði jöfnunarmarkið fyrir Toulouse á 27. mínútu. Goncalo Ramos skoraði svo þriðja mark PSG í uppbótartíma og tryggði liðinu 3-1 sigur.

Með sigrinum styrkti PSG stöðu sína í efsta sæti frönsku úrvalsdeildarinnar. Parísarbúar eru nú með fjögurra stiga forskot á Lens sem situr í öðru sætinu.