Einn besti útherji NFL-deildarinnar farinn í með­ferð

Í síðasta mánuði höfðaði kona í Los Angeles mál gegn Nacua og sakaði hann um að hafa komið með „tilefnislaus gyðingahötursummæli“ á gamlárskvöld og síðar bitið sig í öxlina.

„Hann var búinn að vera í meðferð í umtalsverðan tíma áður en þessar ásakanir komu fram og áætlað er að hann verði þar um hríð,“ sagði Levi McCathern, lögmaður hans, við The California Post.

Neitar ásökunum

Í málsókninni gegn Nacua er vísað til kynbundins ofbeldis, líkamsárásar og vanrækslu. 

Í síðasta mánuði sagði McCathern í yfirlýsingu sem ABC News fékk að Nacua neitaði ásökunum í málsókninni og að hann hefði myndbandsupptökur sem „undirstrika“ að „hegðun og gjörðir“ stefnanda „séu í ósamræmi við þær ásakanir sem bornar eru fram.“

McCathern sagði að Nacua færi í meðferð til að reyna að bæta almenna hegðun sína á öllum sviðum lífsins. McCathern sagði í yfirlýsingu til NFL Network að Nacua muni ljúka meðferðinni tímanlega til að geta tekið þátt í öllum æfingabúðum Rams-liðsins.

Gerðist á gamlárskvöld

Á árlegum deildarfundi NFL fyrr í vikunni sagði þjálfarinn Sean McVay að Rams hefði vitað af atvikinu síðan það átti sér stað á gamlárskvöld og væri áfram að safna öllum upplýsingum.

„En þið vitið, ég treysti hjartalaginu í þessum strák,“ sagði McVay. „Ég elska hann, legg arminn utan um hann og vil halda áfram að hjálpa honum að vaxa og fá allar viðeigandi staðreyndir áður en ég hleyp að ályktunum í þessu tiltekna máli.“'

Í desember gaf Nacua út yfirlýsingu þar sem hann baðst afsökunar á að hafa sýnt látbragð í beinni útsendingu á netinu sem var „gyðingahatur í eðli sínu og viðhélt skaðlegum staðalímyndum gegn gyðingum“. Nacua sagði að „á þeim tíma hefði hann ekki haft hugmynd um“ eðli látbragðsins, sem hefur verið tengt við gyðingahatur.

Tækifæri fyrir hann til að læra og vaxa

„Frammistaðan á vellinum er mögnuð og með því sem frammistaðan hefur leitt af sér fylgir ábyrgð á að vera fulltrúi alls, ekki bara þess. Hann veit það. Þetta eru væntingarnar og við vonum að þetta verði tækifæri fyrir hann til að læra og vaxa,“ sagði McVay.

„Og við vonum að hann verði hjá Rams í mjög langan tíma, en hann skilur hver ábyrgðin er, ekki bara frammistaðan á vellinum,“ sagði McVay.

Eftir að Seattle Seahawks gerði Jaxon Smith-Njigba að launahæsta útherja í sögu NFL var Les Snead, framkvæmdastjóri Rams, spurður hvort hann hikaði við að gera stóran framlengingarsamning við Nacua.

„Núna einbeitum við okkur bara að manneskjunni og svo tökum við næstu skref,“ sagði Snead. „Við leyfum honum að halda áfram að þroskast.“