Húð­flúrum þjálfarans fjölgar eftir sögu­legan sigur Ís­lendings á NM

Ronald vann yfir­burða­sigur gegn heima­manninum Vaino Nore í Finn­landi og tryggði sér sögu­legan Norður­landa­meistara­titil og eru hann og Erika Nótt nú einu Ís­lendingarnir til þess að hafa orðið Norður­landa­meistarar í hnefa­leikum.

„Mér leið mjög vel fyrir bar­dagann. Var með gott sjálf­s­traust. Ég var búinn að æfa úti í útlöndum fyrir þetta og það hafði allt gengið mjög vel,“ segir Ronald í viðtali við íþrótta­deild Sýnar.

„Maður er búinn að vera æfa með gæjum sem eru nú­mer eitt í sínum löndum. Eru betri en gæinn sem þú ert að fara keppa við. Það hjálpar fyrir hausinn. Að vita að þú átt að vinna þetta.“

Allt samkvæmt áætlun

Enn eitt alþjóð­lega mótið sem Ronald ber sigur úr býtum á en báðir Norður­landa­meistarar Ís­lands til þessa hafa æft undir stjórn hnefa­leikaþjálfarans Davíðs Rúnars Bjarna­sonar.

„Það kom mér ekkert á óvart þarna,“ segir Davíð um frammistöðu Ron­alds á mótinu. „Við erum búnir að gera þetta daginn út og inn. Allan tímann að gera sömu hlutina, endur­tekningar eftir endur­tekningar eftir endur­tekningar. Að sjá það verða að veru­leika í hringnum er náttúru­lega bara draumur hvers þjálfara.“

Davíð er ekki sá ró­legasti þegar að kepp­endur hans eru í hringnum að berjast. Hann lifir sig mikið inn í það sem gerist þar.

„Ég hlæ alltaf mikið af því þegar það eru tekin mynd­bönd af mér þegar bar­dagi er í gangi. Það sýnir hvernig mér líður þegar að bar­daginn er í gangi. Ég er alltaf hálf­partinn inn í hringnum, við erum með ákveðið tungumál okkar á milli. Segja ein­hverja hluti sem enginn skilur nema við. Sem er svona boxari-þjálfari sam­band sem enginn skilur. Það lýsir mómentinu vel.“

Lærir af hinu góða og slæma

Ronald nýtir bæði sigra og töp í hringnum sem mikilvæga reynslu. Tap á Norður­landa­mótinu í fyrra hvatti hann áfram til að gera betur í ár og frá mótinu í fyrra hefur hann unnið hvert alþjóð­lega mótið á fætur öðru.

„Alltaf þegar að ég tapa ein­hverju móti þá er það eina sem kemst að að ég ætli að vinna það á næst. Það hefur alltaf gengið hingað til,“ segir Ronald og með sigri hans á mótinu þarf Davíð þjálfari að efna lof­orð.

Húðflúrunum fjölgar

Þú ert að fara fá þér tatt­oo?

„Já. Ég hef alltaf haft það sem lof­orð, eftir að ég fór að fara með lands­liðið á Norður­landa­mótið. Að ef keppandi á mínum vegum myndi vinna mótið þá myndi ég láta flúra skammstöfun þeirra á mig. Ég er nú með nóg af tattúum fyrir. Ég er með ákveðið pláss sem ég held fyrir þetta. Það er bikar á mér með skammstöfuninni hennar Eriku og ég á bókaðan tíma að láta flúra á mig nafnið hans Ron­alds. Þetta er bara eitt­hvað sem ég er stoltur af. Bara gaman.“

Davíð hefur nú lokið við að fá sér húðflúr tengt sigri Ronalds á Norðurlandameistaramótinu. Það má sjá hér fyrir neðan: