„Bara sorry, ég sé þetta ekki gerast“

„Þetta verður alvöru sería. Valur – Keflavík. Þessi lið mættust síðast í úrslitakeppninni 1992,“ segir þáttastjórnandinn Stefán Árni Pálsson.

„Þetta eru lið sem eru bæði á skrýtnum stað komandi inn í þessa úrslitakeppni,“ bætir hann við.

Valur hefur sætt eilítilli gagnrýni og gengið liðsins verið misjafnt í vetur þrátt fyrir augljós gæði. Keflavík er þá einnig sagt á furðulegum stað.

„Þú veist hvað þú ert að fara að fá frá Valsliðinu, meira heldur en Keflavík. Keflavík getur verið eitt besta sóknarlið deildarinnar en svo geta þeir verið mjög skrýtnir. Svo veistu aldrei hvort með Keflavík hvort Remy mæti eða mæti ekki. Þetta er mjög undarlegt. Maður getur eiginlega ekkert sagt til um Keflavík í dag,“ segir Sævar Sævarsson í þættinum.

Remy Martin hefur tæplega getað spilað á sjö daga fresti fyrir Keflavíkurliðið síðan hann mætti aftur til leiks á Reykjanesinu. Menn eiga erfitt með að sjá að hann hafi mikið að segja fyrir liðið þegar farið er að leika á þriggja daga fresti í úrslitakeppninni.

„Þetta er rosalega erfitt fyrir Keflavík að standa í þessu. Hann var tekinn með það í huga að hann ætti að koma liðinu á næsta stig, vitandi hvernig hann var hérna áður. Það var áhætta að gera þetta og sú áhætta hefur ekki skilað sér. En þegar hann er on þá er hann einn sá allra besti og skemmtilegasti leikmaður að horfa á. En ég held að Keflavík sé ekkert að fara að fá frá honum í úrslitakeppninni. Bara sorry, ég sé þetta ekki gerast,“ segir Hermann Hauksson.

Woods getur ráðið úrslitum

Keyshawn Woods getur ráðið úrslitum en hann kom til Vals á miðju tímabili. Hann kom inn af krafti og hann þekkir að spila á þessu stigi, fyrir titlinum, sem hann hefur gert með Tindastóli.

„Það er rosalega mikill plús að vera með leikmann sem þekkir aðstæður, þekkir íslensku úrslitakeppnina. Þegar hann kom í Val byrjaði hann að setja risastór skot og vinna leiki. Maður hugsaði að þetta væri enn eitt púslið í þetta lið. Ef maður horfir yfir byrjunarliðið hjá Val er þetta rosalega sterkt lið, stór nöfn og mikil reynsla. Valsarar eru stórhættulegt lið. Það finnst þeim allir vera í einhverri lægð en svo er sú lægð eitthvað sem skiptir engu máli núna því að það er að byrja nýtt mót,“ segir Hermann.

Töluvert fleira kom fram í umræðunni um einvígið sem sjá má í spilaranum að neðan.

Leikur Vals og Keflavíkur er klukkan 19:30 í kvöld en bein útsending hefst klukkan 19:00 á Sýn Sport Ísland.

Allir fjórir leikir gærkvöldsins og kvöldsins í kvöld verða gerðir upp í Bónus Körfuboltakvöldi eftir leikinn á Hlíðarenda klukkan 21:15.