„Vorum náttúru­lega að mæta Íslandsmeisturunum“

FH-ingar unnu í kvöld sex marka sigur gegn Fram, 27-33. Með sigrinum sendi FH Íslandsmeistara Fram í snemmbúið sumarfrí.

„Ég var rosa ánægður með það hvernig við mættum inn í þennan leik. Við náðum yfirhöndinni og mér fannst við alltaf vera með hana í þessum leik. En við vorum náttúrulega að mæta Íslandsmeisturunum, frábæru liði á þeirra heimavelli, og það var gefið mál að þeir myndu ekki gefast upp hérna. En við unnum bara hrikalega hart að þessu í 60 mínútur og þess vegna endum við í sanngjörnum sex mörkum,“ bætti Sigursteinn við.

Þá hrósaði hann sínum mönnum fyrir mikinn aga í kvöld.

„Eins og ég segi þá vorum við að mæta mjög góðu liði og ég var bara gríðarlega ánægður með hversu agaðir við vorum og hversu mikla vinnusemi við sýndum. Mér fannst það skapa þetta.“

„Við búum líka að því að við áttum við þá einvígi í úrslitakeppninni í fyrra þar sem gekk á ótrúlega mörgum hlutum. Mér fannst við vera góðir í að fókusera á þá þætti sem skiptu máli og þess vegna héldum við haus í dag.“

Sigursteinn og lærisveinar hans bíða nú eftir því að sjá hvort liðið mætir Haukum eða Aftureldingu í undanúrslitum.

„Það á bara eftir að koma í ljós hverja við fáum þar, hvort það verða Haukar eða Afturelding. En við verðum klárir í hvort sem er.“

Hann viðurkennir þó að fyrir hinn hlutlausa aðdáanda væri mun meira spennandi að fá Hafnarfjarðarslag í undanúrslitum.

„Jú, ég held að það viti það nú allir að það eru ótrúlegir leikir. Það yrði einhver nett klikkun, sko,“ sagði Sigursteinn að lokum.