Neitaði að hefja seinni hálf­leik fyrr en stuðnings­menn hlýddu

Þegar seinni hálfleikur FH og Fram átti að hefjast hafði stuðningssveit Fram fært sig í önnur sæti. Sveitin var enn þá í sinni stúku, þar sem stuðningsmönnum gestaliðsins var leyft að vera.

Hlynur Leifsson, eftirlitsmaður HSÍ á leiknum, skipaði dómurum leiksins þá að hefja ekki seinni hálfleikinn fyrr en stuðningsmennirnir færðu sig aftur í sætin þar sem þeir sátu í fyrri hálfleiknum. 

Eftir nokkra stund og mikil mótmæli tókst loks að sannfæra stuðningsmennina. Fyrirliði Fram, Rúnar Kárason, bað þá um að færa sig aftur í hin sætin og seinni hálfleikur hófst.

Vísir hafði samband við formann dómaranefndar HSÍ, Reyni Stefánsson, sem sagði stuðningsmenn Fram ekki hafa brotið neinar reglur um sætisskipan. Þeir hefðu verið í sinni stúku og ekki með trommurnar beint fyrir aftan ritaraborðið, sem er bannað.

Þeir hafi vissulega verið með of margar trommur, aðeins ein er leyfileg, en eftirlitsmaðurinn setti ekkert út á það heldur bara sætisvalið.

Segir reglum hafa verið fylgt

Eftirlitsmaðurinn Hlynur Leifsson vill hins vegar meina að stuðningsmennirnir hafi verið á svæði þar sem þeir máttu ekki sitja, og þar af leiðandi hafi ákvörðunin verið í samræmi við reglur.

Vísir hafði samband við Hlyn í morgun og óskaði eftir rökstuðningi. Hann vildi ekki svara fyrir ákvörðunina símleiðis en svaraði skriflegri fyrirspurn Vísis.

„Um þetta atriði sem þú spyrð um er m.a. fjallað um í reglugerð um handknattleiksmót. Þar er ákvæði sem segir að bannað sé að vera með trommur og/eða lúðra fyrir aftan ritara- og tímavarðaborð og skiptisvæði liða. Þetta er ekkert nýtt og hefur verið í gildi í fjölda ára.

Í leikhléinu kemur ábending frá ábyrgðarmanni leiks og starfsmanni á bekk FH að stuðningsmenn Fram sem eru með trommur séu að færa og staðsetja trommurnar á þann hátt að það sé í andstöðu við reglur.

Óskað var eftir því við þessa stuðningsmenn Fram sem voru með trommurnar að þeir staðsettu sig þannig að það bryti ekki í bága við reglur. Þeir verða ekki við þeirri beiðni. Leikmaður Fram segir þeim svo að færa sig og þá gera þeir það,“ svaraði Hlynur. 

Samkvæmt frétt Handkastsins urðu stuðningsmenn Fram þó við beiðni eftirlitsmannsins um að færa sig og fóru þeir ofar í stúkuna, en seinni hálfleikurinn hófst ekki fyrr en þeir settust á sama stað og þeir höfðu setið í fyrri hálfleik.