FH-ingar 1-0 yfir á móti meisturunum

FH vann á endanum tveggja marka sigur, 28-26, eftir að hafa siglt fram úr á lokakafla leiksins. Sigur í næsta leik þýðir sæti í undanúrslitum og að meistararnir væru farnir í sumarfrí.

Ómar Darri Sigurgeirsson var markahæstur hjá FH með sex mörk en maður leiksins var markvörðurinn Jón Þórarinn Þorsteinsson sem varði átján skot.

Símon Michael Guðjónsson skoraði fjögur mörk og þeir Einar Örn Sindrason, Jón Bjarni Ólafsson, Kristófer Máni Jónasson og Birkir Benediktsson voru allir með þrjú mörk.

Ívar Logi Styrmisson skoraði mest fyrir Fram, eða sex mörk, en Kjartan Þór Júlíusson var með fimm og Rúnar Kárason skoraði fjögur mörk. Breki Hrafn Árnason varði vel framan af leik.

Framarar voru skrefinu á undan í fyrri hálfleik og tveimur mörkum yfir, 12-10, undir lok hálfleiksins og leiddu 13-12 í hálfleik.

FH-ingar skoruðu tvö fyrstu mörk seinni hálfleiks en það var síðan jafnt á flestum tölum.

FH breytti síðan stöðunni úr 18-19 fyrir Fram í 23-19 með því að skora fimm mörk í röð og eftir það voru þeir með tök á leiknum.